Samið var um vaktahvata þegar samið var um við styttingu vinnuvikunnar árið 2020. Hann greiðist sem hlutfall mánaðarlauna vegna fjölbreytileika og fjölda vakta á launatímabili samkvæmt skipulögðum vöktum innan vinnutímaskyldu. Að lágmarki er vaktahvati 2,5% af mánaðarlaunum og mest 12,5% af mánaðarlaunum fyrir þá sem uppfylla skilyrði fyrir greiðslu vaktahvata. 

Tilgangurinn með vaktahvata er að umbuna sérstaklega því starfsfólki sem mætir oft á vaktir og vinnur fjölbreyttar vaktir utan dagvinnutíma.  

Skilyrði fyrir vaktahvata eru eftirfarandi á hverju launatímabili:

• Lágmarksfjöldi vinnuskyldustunda utan dagvinnumarka (á 33,33%, 55%, 65% og 75% álagi) þarf að lágmarki að vera 42 vinnuskyldustundir.  

• Uppfylla þarf a.m.k. tvær tegundir vakta. Vaktir eru flokkaðar í fjórar tegundir:

  • dagvaktir

  • kvöldvaktir (33,33% álag)

  • næturvaktir á virkum dögum (65% álag)

  • helgarvaktir (55% og 75% álag).  

• Lágmarksfjöldi vinnuskyldustunda í hverri tegund vakta skal vera 15 vinnuskyldustundir.  

• Starfsmaður þarf að mæta a.m.k. 14 sinnum eða oftar til starfa.