Í flestum kjarasamningum sem undirritaðir voru vorið 2020 var samið um styttingu vinnuvikunnar. Breytingar á vinnutíma vaktavinnufólks tóku gildi 1. maí 2021. Vinnuvika vaktavinnufólks í fullu starfi er 36 stundir, en fyrir það vaktavinnufólk sem vinnur nokkurn hluta utan dagvinnumarka getur vinnuvikan farið niður í 32 stundir.  

Greiðslur vegna vaktaálags breyttust í kjarasamningum árið 2020. Vaktaálag reiknast af dagvinnukaupi (tímakaupi í dagvinnu).  Vegna styttingar vinnuvikunnar reiknast tímakaup sem 0,632% af mánaðarlaunum fyrir vaktavinnufólk en ekki 0,615% eins og almennt er skv. gr. 1.4.1.  

Vaktaálag er eftirfarandi (sjá fylgiskjal 2 í flestum kjarasamningum frá 2020): 

• 33,33% kl. 17:00 – 24:00 mánudaga til fimmtudaga 

• 55,00% kl. 17:00 – 24:00 föstudaga 

• 65,00%kl. 00:00 – 08:00 þriðjudaga til föstudaga 

• 55,00% kl. 08:00 – 24:00 laugardaga, sunnudaga og sérstaka frídaga 

• 75,00% kl. 00:00 – 08:00 laugardaga, sunnudaga, mánudaga og sérstaka frídaga 

• 90,00% kl. 00:00 – 24:00 stórhátíðardaga, þó þannig að frá kl. 16:00 til 24:00 á aðfangadag og gamlársdag og kl. 00:00 til 08:00 á jóladag og nýársdag er 120% álag. 

Brot úr klukkustund greiðist hlutfallslega.