Það eru ákveðin skilyrði sem þú og barnið þurfið að uppfylla til þess að eiga rétt á dvalarleyfi fyrir barn.

Allir umsækjendur um dvalarleyfi þurfa að uppfylla ákveðin skilyrði en þegar sótt er um dvalarleyfi fyrir barn þurfa bæði foreldri/ar og barnið að uppfylla sérstök skilyrði. Barnið þarf að vera yngra en 18 ára, búa hjá foreldri og barnið þarf að vera í forsjá og vera á framfæri foreldris.

Foreldri sem býr á Íslandi þarf þannig að vera bæði með forsjá og vera kyn- eða kjörforeldri barnsins. Forsjáraðili sem ekki er líffræðilegt foreldri barnsins getur ekki fengið dvalarleyfi fyrir barnið nema hafa ættleitt barnið. Hafið í huga að ættleiðingin þarf að vera í samræmi við íslensk ættleiðingar lög til þess að hún sé tekin gild.

Einnig þarf skriflegt samþykki þess forsjáraðila sem ekki býr á Íslandi að fylgja umsókn ef foreldrar deila forsjá. Skjalið þarf að staðfesta að forsjáraðili sé samþykkur því að barnið flytjist til Íslands og þarf að fylgja umsókn.