Ljúki hjúskap eða sambúð vegna þess að handhafi makaleyfis eða barn viðkomandi hefur sætt ofbeldi eða misnotkun í sambandinu er heimilt að veita viðkomandi dvalarleyfi á grundvelli sérstakra tengsla við Ísland.

Ákvörðun um endurnýjun dvalarleyfis á þessum grundvelli er undantekning og þarf Útlendingastofnun að meta þau gögn sem liggja fyrir í hverju og einu máli fyrir sig. Til þess þurfa stofnuninni að berast eins ítarleg gögn og mögulegt er.

Útlendingastofnun tekur fram að ekki eru lagðar of strangar sönnunarkröfur á umsækjanda um ástæður sambandsslita en umsækjandi þarf þó að sýna fram á misnotkunina eða ofbeldið eins og mögulegt er.

Almenn viðmið

• Þú verður að hafa verið áður með dvalarleyfi á grundvelli hjúskaparins eða sambúðarinnar.

• Ofbeldið eða misnotkunin þarf að hafa verið tilkynnt lögreglu eða barnaverndaryfirvöldum eða önnur gögn að benda til þess. 

• Athugaðu að læknaskýrslur, sálfræðiskýrslur, lögregluskýrslur eða yfirlýsing frá Kvennaathvarfi eða öðrum stofnunum þar sem þú hefur dvalið, geta stutt frásögnina.

• Þú þarft áfram að uppfylla framfærsluskilyrði sem og önnur skilyrði laganna og ríkar sanngirnisástæður þurfa að mæla með því.

  • En, víkja má frá framfærsluskilyrðum ef framfærsla er ótrygg um skamma hríð. Þá skiptir einnig máli að hjúskapur eða sambúð hafi ekki varað í mjög skamman tíma. 

Sjónarmið að baki þessu ákvæði eru þau að koma í veg fyrir að einstaklingur telji sig knúinn til að vera áfram í hjúskap eða sambúð svo að hann haldi dvalarleyfi sínu þótt viðkomandi einstaklingur eða börn hans sæti misnotkun eða ofbeldi af hálfu maka.