Sækja um vegabréfsáritun til Íslands (Schengen-áritun)

Á þessari síðu getur þú fundið upplýsingar um hvernig skráning og meðferð persónuupplýsinga vegna vegabréfsáritana eru unnar af utanríkisráðuneytinu.

Hvað er VIS-kerfið?

Upplýsingakerfi um vegabréfsáritanir (e. Visa Information System og hér eftir „VIS-kerfið“) gerir Schengen-ríkjunum kleift að skiptast á vegabréfsáritunargögnum. Það samanstendur af miðlægu upplýsingakerfi og samskiptatækni sem tengir þetta miðlæga kerfi við innlend kerfi. VIS-kerfið tengir ræðisskrifstofur í löndum utan Evrópusambandsins og allar landamærastöðvar á ytri landamærum Schengen-ríkjanna.

Hvernig eru persónuupplýsingar þínar unnar í vegabréfsáritunarmálum?

Upplýsingar sem umsækjandi leggur til í sambandi við umsókn um vegabréfsáritun verða færðar inn og geymdar í íslenska hluta VIS-kerfisins (N-VIS) sem og í sameiginlegt VIS-kerfi Schengen ríkjanna (C-VIS). Þetta á einnig við um upplýsingar sem umsækjandi og gestgjafa handhafa vegabréfsáritunar kunna að veita í tengslum við umsókn um framlengingu á vegabréfsáritunar. Skráningin er skylda.

N-VIS er tölvustýrð skrá sem utanríkisráðuneytið hefur umsjá með. C-VIS er tölvustýrð miðlæg vegabréfsáritunarskrá fyrir Schengen ríkin.

Hvaða yfirvöld hafa aðgang að upplýsingunum?

Allar persónuupplýsingar umsækjanda sem koma fram á umsókn um vegabréfsáritun, sem og fingraför og passamynd eru skráðar í íslenska hluta VIS-kerfisins (N-VIS) sem og í sameiginlegt VIS-kerfi Schengen ríkjanna (C-VIS) þar sem þær eru unnar af viðeigandi yfirvöldum Schengen ríkja, í þeim tilgangi að taka ákvörðun um útgáfu vegabréfsáritunar. Upplýsingarnar eru vistaðar í kerfunum í að hámarki 5 ár og eru á þeim tíma aðgengilegar utanríkisráðuneytinu, starfsstöðvum utanríkisráðuneytisins sem sinna útgáfu vegabréfsáritana og lögreglunni.

Öllum persónuupplýsingum er varða gestgjafa handhafa vegabréfsáritunar sem koma fram í boðsbréfi vegna heimsóknar er miðlað til viðeigandi yfirvalda Schengen ríkjanna og unnar af þeim yfirvöldum, í þeim tilgangi að taka ákvörðun um útgáfu vegabréfsáritunar.

Hver er réttur þinn til að nálgast, leiðrétta eða eyða skráðum persónuupplýsingum?

Þú átt rétt á að vita hvaða persónuupplýsingar um þig hafa verið skráðar í N-VIS og C-VIS kerfin og hvaða aðildarríki skráði upplýsingar. Þú átt rétt á að ranglega skráðar persónuupplýsingar þínar séu leiðréttar eða þeim eytt.

Utanríkisráðuneytið er ábyrgðaraðili vinnslu persónuupplýsinga í VIS-kerfinu af hálfu Íslands. Ef þú vilt nýta réttindi þín þarftu að fylla út meðfylgjandi eyðublað til að óska eftir aðgangi, leiðréttingu eða eyðingu upplýsinga. Eyðublaðið skal senda til utanríkisráðuneytisins í bréfpósti eða með tölvupósti:

Utanríkisráðuneytið
Reykjastræti 8
101 Reykjavík
Íslandi

Netfang: visa@utn.is.

Nauðsynlegt er að láta afrit af persónuskilríki fylgja með framangreindum beiðnum. Óski annar einstaklingur eftir upplýsingum en sá sem upplýsingarnar varða ber að framvísa gildu umboði þess efnis.

Eftirlitsyfirvald

Verði ábyrgðaraðilar ekki við upplýsingabeiðni er hægt að beina kvörtun til persónuverndarstofnunar í því landi. Persónuvernd hefur eftirlit með því að reglum Schengen-samstarfsins um meðferð persónuupplýsinga sé fylgt á Íslandi. Teljir þú að vinnsla persónuupplýsinga sé ekki í samræmi við lög sem um hana gilda getur þú sent erindi til Persónuverndar: postur@personuvernd.is.

Nánari upplýsingar

Á heimasíðu framkvæmdastjórnar Evrópusambandsins er að finna nánari upplýsingar um VIS-kerfið.

Nánari upplýsingar má finna í persónuverndarstefnu utanríkisráðuneytisins.