Heimilt er að framlengja gildistíma útgefinnar vegabréfsáritunar og/eða lengd dvalartíma sem hún heimilar, ef gildistími hennar er styttri en 90 dagar. Ekki er hægt að sækja um framlengingu áritunar sem gefin var út í 90 daga.
Almennt er ekki heimilt að framlengja áritun lengur en svo að dvölin verði lengri en 90 dagar á 180 daga tímabili.
Skilyrði
Til að sækja um framlengingu þarf handhafi áritunar að sýna fram á:
(1) Óviðráðanlegar aðstæður (force majeure) eða (2) mannúðarástæður sem koma í veg fyrir að handhafi áritunarinnar geti yfirgefið Schengen-svæðið áður en gildistími áritunarinnar eða dvalartíminn sem hún heimilar rennur út.
Dæmi um óviðráðanlegar aðstæður:
Flugfélag breytir flugáætlun á síðustu stundu (til dæmis vegna veðurs eða verkfalls).
Dæmi um mannúðarástæður:
Skyndileg alvarleg veikindi viðkomandi sem koma í veg fyrir að viðkomandi geti ferðast eða skyndileg alvarleg veikindi eða andlát náins ættingja sem býr í aðildarríki.(3) Mikilvægar persónulegar aðstæður sem réttlæta framlengingu á gildistíma eða dvalartíma.
Dæmi um alvarlegar persónulegar aðstæður:
Viðkomandi ferðast til Schengen til að sækja fjölskyldumeðlim sem hefur gengist undir aðgerð. Daginn fyrir fyrirhugaða heimför versnar ástand sjúklingsins og honum er ekki heimilt að yfirgefa sjúkrahúsið fyrr en tveimur vikum síðar.
Umsókn
Umsóknir er aðeins hægt að leggja fram rafrænt með tölvupósti á netfangið visa@utn.is.
Kostnaður
Ekkert gjald er tekið fyrir framlengingu áritunar vegna óviðráðanlegra aðstæðna eða mannúðarástæðna.
Gjald vegna framlengingar vegabréfsráritunar vegna mikilvægra persónulegra aðstæðna er 30 evrur, ef umsóknin er samþykkt.
Fylgigögn með umsókn um framlengingu
Ljósrit af vegabréfi.
Ljósrit af gildandi áritun.
Ferðasjúkratrygging.
Bréf til rökstuðnings beiðninni.
Læknisvottorð, ef við á.
Þjónustuaðili
Utanríkisráðuneytið