Hvenær fæ ég svar við umsókninni minni?

Þú getur séð hvaða umsóknir eru í vinnslu og hversu langan tíma afgreiðsla hefur að jafnaði tekið það sem af er þessu ári með því að velja tegund þinnar umsóknar í listanum hér að neðan.

Síðast uppfært 7. október 2026.

Hvað þýðir þetta fyrir umsóknina mína?

Ef umsókn þín barst síðar en í þeim mánuði sem nú er verið að taka til vinnslu þá bíður hún þess enn að verða afgreidd.

Ef hún barst fyrr þýðir það ekki endilega að afgreiðslu sé lokið. Þegar umsókn hefur verið tekin til vinnslu þýðir það að hún sé komin á borð sérfræðings sem kannar hvort skilyrði veitingar séu uppfyllt.

Ef umsókn er ófullnægjandi eða ef gögn vantar hefur stofnunin samband við þig eða umboðsmann þinn. Í sumum tilfellum þarf Útlendingastofnun að afla viðbótargagna, til dæmis hjá lögreglu og/eða skattayfirvöldum. Það getur því liðið nokkur tími frá því að umsókn er tekin til vinnslu þar til hún er afgreidd.

Hvers vegna tekur svona langan tíma að fá svar við umsókn?

Afgreiðslutími umsókna er mislangur eftir tegund umsóknar og fjölda umsókna sem berast Útlendingastofnun. Biðtími eftir því að umsókn sé tekin til vinnslu fer að miklu leyti eftir því hversu margar umsóknir af sömu tegund hafa borist stofnuninni. Því fleiri umsóknir sem berast, því lengri getur biðin orðið eftir því að röðin komi að hverri umsókn.

Þegar umsókn hefur verið tekin til vinnslu tekur afgreiðsla hennar yfirleitt ekki langan tíma, að því gefnu að öll nauðsynleg gögn liggi fyrir og hægt sé að staðfesta að skilyrði dvalarleyfis séu uppfyllt. Í sumum tilvikum þarf þó að afla frekari upplýsinga eða fara ítarlegar yfir umsókn áður en hægt er að taka ákvörðun. Það getur lengt afgreiðslutímann.

Mikilvægt er að umsókn sé rétt og vel útfyllt og að öll nauðsynleg fylgigögn séu lögð fram með henni. Það getur komið í veg fyrir óþarfa tafir þegar umsóknin er tekin til vinnslu.

Þarf ég að hafa samband út af umsókninni minni?

Ef umsókn þín bíður þess að verða tekin til vinnslu getum við ekki veitt nánari upplýsingar um stöðu hennar í síma, tölvupósti eða netspjalli.

Ef frekari gögn eða upplýsingar vantar mun Útlendingastofnun hafa samband við þig eða umboðsmann þinn.

Á upplýsingasíðunni Hef sótt um finnur þú svör við algengum spurningum sem gætu vaknað á meðan þú bíður eftir svari við umsókn þinni.