Ellilífeyrir

Ellilífeyrir frá Tryggingastofnun eru greiðslur sem þú getur átt rétt á þegar þú nærð 67 ára aldri, en hægt er að sækja um frá 65 ára aldri.

Réttur til ellilífeyris miðast við búsetu og eru greiðslurnar fjármagnaðar af ríkissjóði, þær eru hluti af almannatryggingakerfinu og eru hugsaðar sem viðbót við réttindi úr atvinnutengdum lífeyrissjóðum.

Almennar upplýsingar

Þú getur átt rétt á ellilífeyri ef þú:

• hefur náð ellilífeyrisaldri, ert orðinn 67 ára eða eldri.

• ert 65 ára. Með snemmtöku lækka greiðslur ellilífeyris um 12,24%

• hefur átt lögheimili á Íslandi í minnst þrjú ár á aldrinum 16 til 67 ára.

• ert búin/n að sækja um greiðslur í lífeyrissjóðum.

Full réttindi myndast við 40 ára búsetu á Íslandi milli 16 til 67 ára aldurs, búsetan þarf ekki að vera samfelld. Ef búseta er styttri en 40 ár reiknast réttindi hlutfallslega við búsetu. Ísland hefur gert samninga við fjölda landa til að tryggja að fólk geti flutt og starfað erlendis án þess að missa áunnin réttindi.

Hafir þú búið erlendis gætir þú átt rétt á ellilífeyri þaðan.

Til að styrkja framfærslu einstaklinga sem búsettir eru á Íslandi og eiga engin eða takmörkuð ellilífeyrislífeyrisréttindi í almannatryggingum eru greiddar viðbótargreiðslur.

Umsóknarferli

Þú getur fyllt út umsókn:

• rafrænt á Mínum síðum TR,

• í eigin persónu í þjónustumiðstöð Hlíðasmára 11 í Kópavogi,

• hjá umboðsmönnum TR hjá sýslumönnum um land allt.

Fylgigögnum má skila í gegnum Mínar síður.

Ef þú færð örorkulífeyri við 67 ára aldur þarft þú ekki að sækja um. Lífeyrinn breytist sjálfkrafa í ellilífeyri.

Ef þú býrð erlendis þarftu að sækja um í gegnum viðeigandi stofnun í búsetulandi. TR sér um að koma umsókninni áfram til lífeyrissjóða þar sem möguleg réttindi eru til staðar.

Tekjuáætlun

Upphæð ellilífeyris er tengd tekjum. Greiðslur lækka miðað við aðrar tekjur sem þú færð. Mikilvægt er að skila tekjuáætlun með umsókn þinni en hana er hægt að fylla út með sömu leiðum og umsóknina.

Frítekjumörk ráða hversu mikið ellilífeyrir lækkar í hlutfalli við aðrar tekjur. Því er mikilvægt að tekjuáætlun þín sé alltaf rétt.

Þú getur breytt tekjuáætlun á Mínum síðum Tryggingastofnunar.

Niðurstaða

Þegar niðurstaða liggur fyrir færðu tölvupóst og tilkynningu á Mínum síðum TR undir Mín skjöl.

Þar getur þú einnig séð upphæðir út árið í greiðsluáætlun.

Ef þú ert ósammála ákvörðuninni getur þú:

• óskað eftir rökstuðningi á Mínum síðum TR,

• sent erindi til umboðsmanns viðskiptavina TR,

• eða kært úrskurðinn til úrskurðarnefndar velferðarmála.

Fyrirkomulag greiðslna

Ellilífeyrir er fyrirframgreiddur fyrsta dag hvers mánaðar og þú færð upphæðina inn á bankareikninginn þinn sem gefinn er upp á Mínum síðum.

Hægt er að fá eina greiðslu á ári í stað mánaðarlegra greiðslna ef inneign er til staðar að loknu uppgjöri Tryggingastofnunar.

Kosturinn við að fá greitt einu sinni á ári á grundvelli skattframtals er að þú færð nákvæmlega það sem þú átt rétt á. Þá er engin hætta á að fá kröfu við uppgjör vegna ofgreiddra greiðslna. Sótt er um eina greiðslu á ári á Mínum síðum TR.