Maka- og umönnunarbætur fullorðinna

Maka- og umönnunarbótum er ætlað að koma til móts við tekjutap einstaklings sem getur ekki verið á vinnumarkaði að öllu leyti eða hluta vegna umönnunar maka eða annars fullorðins heimilismanns.

Athugið að upplýsingar um umönnunargreiðslur vegna langveikra og fatlaðra barna má finna hér.

Almennar upplýsingar

Þú getur sótt um maka- og umönnunarbætur ef þú hefur orðið fyrir tekjutapi eða tekjuleysi vegna umönnunar nákomins aðila.

Einstaklingurinn sem nýtur umönnunar þarf að fá mánaðarlegar greiðslur:

• örorkulífeyris,

• örorkustyrks,

• sjúkra- og endurhæfingargreiðslna

eða

• ellilífeyris.
  

  Umsóknir eru samþykktar í hámark 1 ár í senn.

Skilyrði

Einstaklingur sem sér um umönnun þarf að uppfylla eftirfarandi skilyrði:

• má ekki hafa greiðslur örorkulífeyris, ellilífeyris eða sjúkra- og endurhæfingargreiðslur frá TR,

• verður að geta sýnt fram á að tekjur hafi lækkað eða fallið niður vegna umönnunar,

• umönnun þarf að fara fram á Íslandi,

• samanlagðar tekjur ásamt maka- og umönnunarbótum mega ekki vera hærri en 856.085 krónur.

Réttur fellur niður eða réttur ekki til staðar

Réttur til maka- og umönnunargreiðslna fellur niður eða er ekki til staðar ef umsækjandi:

• Fær greiðslur örorkulífeyris, ellilífeyris eða sjúkra- og endurhæfingargreiðslur,

• Getur ekki sýnt fram á tekjumissi eða tekjuleysi vegna umönnunar. Við mat á tekjumissi/tekjuleysi er meðal annars horft til breytinga á aðstæðum umönnunaraðila.

• Er með atvinnuleysisbætur.

• Er í fullu námi.
  
  Við mat á réttindum er einnig horft til:

• Hvort einstaklingur sem þarfnast umönnunar sé með NPA – samning í gildi.

• Hvort einstaklingur sem þarfnast umönnunar sé í dagvistun.

Fjárhæð maka- og umönnunarbóta

Upphæðin er 250.170 krónur á mánuði.

Atvinnutekjur og maka- og umönnunarbætur mega ekki vera hærri en 856.085 krónur fyrir skatt á mánuði en það viðmið er þegar réttindi til ellilífeyris hjá TR falla niður.