Heimilisuppbót fyrir lífeyris- og greiðsluþega sem búa einir

Heimilisuppbót er viðbót við greiðslur frá TR. Hún bætist ofan á örorkulífeyri, sjúkra- og endurhæfingargreiðslur og ellilífeyri þeirra sem búa einir og eru með lögheimili á Íslandi.

Almennt

Þú þarft að vera:

• einhleyp/ur, hvorki í sambúð né hjónabandi, nema maki búi á hjúkrunarheimili.

Þú getur fengið heimilisuppbót ef þú býrð:

• í eigin húsnæði,

• í leiguhúsnæði,

• á sambýli,

• á áfangaheimili.

• með börnum undir 18 ára aldri,

• með ungmenni á aldrinum 18 til 25 ára í námi eða starfsþjálfun eða

• ein/n en maki býr á hjúkrunarheimili (á ekki við ef þú ert með sjúkra- og endurhæfingargreiðslur).

Húsnæðis- og búsetuskilyrði

Heimili þitt verður að hafa eldunar- og salernisaðstöðu til einkanota.

Ef þú deilir eldunar- eða salernisaðstöðu með öðrum telstu ekki búa ein/n.

Þú verður að hafa lögheimili þar sem þú býrð.

Ef þú dvelur á sambýli eða áfangaheimili getur þú sótt um heimilisuppbót þrátt fyrir ofangreind skilyrði.

Áfangaheimili

Þegar viðskiptavinur sækir um heimilisuppbót og er á áfangaheimili þarf einnig að skila inn staðfestingu frá forstöðumanni áfangaheimilis um að viðskiptamaðurinn sé heimilismaður á áfangaheimilinu, hvenær hann flutti þangað og að um sé að ræða heimili sem starfrækt er með það að markmiði að stuðla að endurhæfingu einstaklinga.

Sambýli

Þegar viðskiptavinur sækir um heimilisuppbót og er á sambýli þarf að skila inn staðfestingu frá forstöðumanni sambýlisins. Í staðfestingunni þarf að koma fram að þú búir þar, tímabil búsetu og hvort um sé að ræða búsetu í sértæku húsnæðisúrræði.

Tilkynna breytingar

Mikilvægt er að tilkynna breytingar á búsetu þinni til TR. Til dæmis ef þú flytur, ferð í sambúð eða einhver flytur lögheimilið sitt til þín.