Ellilífeyrir frá öðru EES-landi eða Bandaríkjunum

Ef þú hefur búið eða starfað erlendis getur þú hafa unnið þér inn lífeyrisréttindi í því landi. Brottfluttir Íslendingar og erlendir ríkisborgarar sem hafa búið eða starfað á Íslandi geta einnig átt lífeyrisréttindi á Íslandi.

Réttur til ellilífeyris erlendis

Þú getur átt rétt á ellilífeyri erlendis ef:

• þú býrð eða hefur búið og starfað í útlöndum,

• landið er með samning við Ísland um greiðslur lífeyris almannatrygginga.

Tekjuáætlun

Upphæð ellilífeyris er tengd tekjum. Frítekjumörk ráða hversu mikið ellilífeyrir lækkar í hlutfalli við aðrar tekjur. Því er mikilvægt að tekjuáætlun þín sé alltaf rétt.

Breyta tekjuáætlun á Mínum síðum

Umsóknarferli

Ef þú býrð erlendis við töku ellilífeyris hefur þú samband við sambærilega stofnun Tryggingastofnunar þess lands.

Ef þú býrð á Íslandi þarft þú:

• bankaupplýsingar,

• skattframtal eða aðra staðfestingu um réttindi erlendis,

• að gera tekjuáætlun um tekjur þínar í framtíðinni,

• upplýsingar um nýtingu persónuafsláttar.

Starfsfólk TR sendir því næst umsóknina til viðkomandi lands.

Svona sækir þú um

Niðurstaða

Þegar niðurstaða liggur fyrir færðu bréf frá stofnuninni erlendis sem sótt var um til.

Fyrirkomulag greiðslna

Ellilífeyrir er fyrirframgreiddur fyrsta dag hvers mánaðar.

Ef þú ert með erlendan bankareikning sér Tryggingastofnun um að millifæra greiðslur. Millifærslur á erlenda reikninga fara í gegnum viðskiptabanka til erlendra banka. Athugið að gefa verður upp erlent heimilisfang til banka til að fá greiðslur á erlendan reikning.

Hægt er að fá eina greiðslu á ári í stað mánaðarlegra greiðslna ef inneign er til staðar að loknu uppgjöri Tryggingastofnunar.

Kosturinn við að fá greitt einu sinni á ári á grundvelli skattframtals er að þú færð nákvæmlega það sem þú átt rétt á. Þá er engin hætta á að fá kröfu við uppgjör vegna ofgreiddra greiðslna.

Upplýsingar um erlendar tekjur og lífsvottorð

Ef þú ert með ellilífeyrisgreiðslur frá TR og ert erlendis búsett/ur þarftu að skila einu sinni á ári:

Fyrir 1. ágúst: afriti af skattframtali þínu og maka (ef við á) frá búsetulandi. Ef þú telur fram til skatts með maka þínum þurfið þið bæði að skila inn sundurliðun vegna tekna ykkar, til dæmis launaseðlum eða yfirliti yfir lífeyrisgreiðslur.

Fyrir 31. desember: lífsvottorði, það má vera á eyðublaði TR eða á sambærilegu eyðublaði frá búsetulandi. Það verður að vera formlega vottað af opinberum aðila í búsetulandi, til dæmis stofnun fyrir almannatryggingar, þjóðskrá, bæjar- eða skattayfirvöldum, lögreglu, læknum eða öðrum opinberum stofnunum.

Ef þessum gögnum er ekki er skilað á tilsettum tíma getur komið til stöðvunar greiðslna frá TR.

Athugið, ef þú skilar ekki skattframtali í búsetulandi vegna þess að tekjur eru undir viðmiðunarmörkum þarf staðfesting þar að lútandi að berast frá skattayfirvöldum í því landi. Þá þarf líka að skila inn afriti af greiðsluseðlum lífeyris og/eða launa.

Upplýsingar um erlent heimilisfang

Þegar greiðslur hefjast hjá TR skráum við erlent heimilisfang þitt sem kemur fram í umsókn. Ef til flutninga kemur frá Íslandi eða á milli staða erlendis er mikilvægt að láta TR vita um nýtt heimilisfang þitt. Ef ekki er látið vita um nýtt heimilisfang getur komið til stöðvunar greiðslna.

Hægt er að senda upplýsingar um nýtt heimilisfang á eftirfarandi hátt:

senda erindi í gegnum Mínar síður á tr.is,

senda tölvupóst á netfangið eftirlit@tr.is