Persónuafsláttur og skattþrep launatekna

Hlusta

Skattur af launum og lífeyri er reiknaður við hverja mánaðarlega útborgun og því er talað um staðgreiðslu skatta. Staðgreiðslan skiptist í tekjuskatt til ríkissjóðs og útsvar til viðkomandi sveitarfélags.

Staðgreiðsla miðast við skattstofn, sem er í stuttu máli laun og lífeyrir að frádregnum greiðslum (til dæmis í lífeyrissjóð og séreignasparnað).

Sjá nánar um skattstofn og útsvar á vef Skattsins.

Persónuafsláttur 2026 er 72.492 krónur á mánuði, eða 869.898 krónur fyrir allt árið.

Skattþrep

Það hversu hátt hlutfall er greitt í skatt er breytilegt eftir tekjum og í gildi eru þrjú skattþrep:

Skattþrep	Af tekjum	Skatthlutfall
Skattþrep 1	0 - 498.122 kr.	31,49%
Skattþrep 2	498.123 - 1.398.450 kr.	37,99%
Skattþrep 3	yfir 1.398.450 kr.	46,29%

Ef launagreiðendur eru fleiri en einn þarf að upplýsa þá um hvaða skattþrep þú vilt nota hjá hverjum og einum svo réttur skattur sé dreginn af heildarlaunum.

Persónuafsláttur

Allir einstaklingar búsettir á Íslandi, 16 ára og eldri, mega draga fasta upphæð (persónuafslátt) 72.492 krónur frá skattgreiðslum í hverjum mánuði.

Það er á ábyrgð hvers og eins hvernig persónuafsláttur er nýttur og að upplýsa launagreiðanda þannig að réttur skattur sé dreginn af launum við útborgun. Þetta á sér í lagi við ef launagreiðendur eru fleiri en einn.

Á þjónustuvef Skattsins er hægt að sjá hvernig persónuafsláttur hefur verið nýttur, best er að skoða það eftir sautjánda hvers mánaðar þegar allar upplýsingar hafa borist frá launagreiðendum.

Sjá nánar um skattgreiðslur barna og unglinga og persónuafslátt við flutning til Íslands.

Þegar skipt er um vinnu, eða aðrar breytingar verða, er það á þína ábyrgð að upplýsa launagreiðanda um eftirfarandi:

Hvort þú ætlir að nýta persónuafslátt og þá hvaða dagsetningu á að miða við
Hvort að þú eigir uppsafnaðan persónuafslátt
Hvaða skattþrep á að nota

Margir launagreiðendur óska eftir staðfestingu á stöðu persónuafsláttar af þjónustuvef Skattsins. Hana má vista og senda til launagreiðanda.

Þegar staðgreiðsla var fyrst tekin upp voru þessar upplýsingar skráðar á skattkort sem launagreiðandi varðveitti, en þau eru ekki lengur notuð.

Sjá nánar um persónuafslátt og skattþrep við breytingar á störfum og persónuafslátt og fæðingarorlof.

Nýting persónuafsláttar

Persónuafsláttur safnast upp frá mánuði til mánaðar og ekki má ofnýta hann.

Ef persónuafsláttur er ekki fullnýttur, til dæmis hjá þeim sem vinna ekki allt árið, má nýta uppsafnaðan afslátt fyrir lok árs. Sjá nánar um uppsafnaðan persónuafslátt og persónuafsláttur við flutning til Íslands.

Makar geta samnýtt persónuafslátt, til dæmis ef annar er ekki með reglulegar tekjur. Sjá nánar um nýtingu persónuafsláttar maka.

Ef persónuafsláttur er ofnýttur eða ef staðgreiðsluskattur er greiddur í of lágu skattþrepi er mikilvægt að bregðast við því sem fyrst svo ekki verði skuld í lok árs.

Ofnýting á persónuafslætti getur til dæmis orðið við breytingar á borð við nýtt starf, fæðingarorlof eða þegar taka lífeyris hefst. Skatturinn sendir reglulega tilkynningar til þeirra sem hafa ofnýtt persónuafslátt og/eða greitt í röngu skattþrepi. Sjá nánar um ofnýttan persónuafslátt.

Yfirlit yfir nýtingu persónuafsláttar

Á þjónustuvef Skattsins