Notkun mælitalna gerir það kleift að setja niðurstöður ólíkra prófa á sama kvarða svo hægt sé að bera þær saman. Það auðveldar kennurum að átta sig betur á samspili lykilþátta náms og sjá hvar styrk- og veikleikar nemenda liggja.

Mælitölur eru á kvarðanum 1-19 þar sem mælitalan 10 er alltaf landsmeðaltal. Mælitala lýsir því hvar nemandi er staddur í samanburði við jafnaldra og landsmeðaltal. Nemendur með hærri mælitölu en 10 eru þá yfir landsmeðaltali og nemendur með lægri mælitölu eru fyrir neðan landsmeðaltal.

Hverri mælitölu fylgir lýsing á stöðu nemandans og almennar upplýsingar um næstu áherslur í námi og nýtast þannig við túlkun á niðurstöðum og ákvörðun um næstu skref.

Nemendur með mælitöluna 7 og undir þurfa sérstök inngrip og mælst er til þess að kennarar fylgi þeim eftir með nauðsynlegum aðgerðum.

Raðeinkunn er mælikvarði á frammistöðu nemenda í samanburði við aðra nemendur í sama árgangi á landsvísu. Hún endurspeglar því hvar nemandinn stendur í röðinni. Ef nemandi fær raðeinkunnina 47 þýðir það að hann stendur sig jafn vel eða betur en 47% nemenda á landsvísu.

Hlutfall réttra svara endurspeglar hversu stórum hluta af spurningum prófs nemandi svaraði rétt. Þar sem fleiri en ein útgáfa af bæði lesskilnings- og stærðfræðiprófinu eru lagðar fyrir sama árgang eru hlutföllin vigtuð með tilliti til þyngdar prófanna.

Öryggisbil eru notuð til að undirstrika þá óvissu sem fylgir öllum mælingum. Óvissa kemur til af ýmsum orsökum, eins og t.d. dagsformi nemenda. Því er frammistaða á prófum oft sett fram sem ein mælitala (t.d. 10) ásamt víðara bili (t.d. 9-11), sem líkur eru á að nemandi væri innan ef hann tæki prófið aftur.

Nánar er fjalla um framsetningu og túlkun niðurstaðna undir köflunum Stöðu- og framvindupróf í stærðfræði og Stöðu- og framvindupróf í lesskilningi