Öndunarfærasýkingar – Vika 45 árið 2025

Eins og áður koma langflest sýni til rannsóknar frá spítölum en færri frá heilsugæslunni.

Staðan á íslandi

Greiningum á inflúensu hefur fjölgað og í viku 45 greindust 52 tilfelli inflúensu. Inflúensan er fyrr á ferðinni en undanfarna vetur og hefur Landspítali þurft að fresta fjölda skurðaðgerða vegna hópsýkingar á spítalanum.

Inflúensa

Í viku 45 greindust 52 tilfelli, inflúensu þar af 19 með inflúensutegund A(pdm09) og 33 með tegund A(H3). Þeir sem greindust voru í öllum aldurshópum en 16 einstaklingar voru 65 ára og eldri, 18 voru 15-64 ára, sex voru 5-14 ára og 12 undir 5 ára.

Nánari upplýsingar um inflúensu má finna á vef embættis landlæknis.

Árviss bólusetning gegn inflúensu er hafin á heilsugæslustöðvum. Hægt er að bóka tíma á mínum síðum á heilsuveru eða með því að hringja í sína heilsugæslustöð.

Sóttvarnalæknir mælist til að eftirtaldir áhættuhópar njóti forgangs við inflúensubólusetningar og eru þeir hópar sérstaklega hvattir til að þiggja bólusetningu sem fyrst:

• Allir einstaklingar 60 ára og eldri.

• Börn undir 5 ára aldri sem náð hafa 6 mánaða aldri við bólusetningu.

• Öll börn og fullorðnir sem þjást af langvinnum hjarta-, lungna-, nýrna- og lifrarsjúkdómum, sykursýki, offitu, illkynja sjúkdómum og öðrum ónæmisbælandi sjúkdómum.

• Barnshafandi.

• Heilbrigðisstarfsmenn sem annast einstaklinga í áhættuhópum sem taldir eru upp hér að ofan.

• Fólk í starfstengdri áhættu vegna hugsanlegs samsmits árlegrar inflúensu og fuglainflúensu.

RS-veirusýkingar

RS-veiru (RSV) faraldur er ekki farinn af stað hérlendis og greindist ekkert tilfelli RS-veiru (RSV) í viku 45.

Einstofna mótefni gegn RSV (nirsevimab) fyrir yngstu börnin er komið í dreifingu til heilbrigðisstofnana. Nú í vetur býðst mótefnið börnum sem eru fædd 1. maí 2025 eða síðar auk barna 6−23 mánaða sem Barnaspítali Hringsins hefði að öðrum kosti boðað í mánaðarlegar lyfjagjafir með palivizumab yfir RSV tímabilið. Börn sem fæðast í vetur, um það bil fram til 31. mars 2026 munu geta fengið mótefni gegn RSV fljótlega eftir fæðingu.

Nánari upplýsingar um RSV veirusýkingar og bólusetningar gegn RSV má finna á vef embættis landlæknis.

COVID-19

Fjöldi tilfella COVID-19 hefur haldist nokkuð stöðugur síðustu vikur en fer lækkandi. Í viku 45 greindust fjórir einstaklingar, einn í aldursflokknum 65 ára og eldri, tveir 15-64 ára og einn undir 5 ára.

Aðrar öndunarfærasýkingar

Áfram greinist mest af rhinoveiru (kvefi) af öðrum öndunarfæraveirum á sýkla- og veirufræðideild Landspítala. Undanfarinn mánuð hefur vikulegur fjöldi rhinoveirugreininga verið á bilinu 20–40 og greindust 23 með rhinoveiru í viku 45.

Innlagnir á Landspítala

Í viku 45 lágu 19 einstaklingar á Landspítala með inflúensu, tólf 65 ára og eldri, sex 15-64 ára, einn undir 1 ára. Einn einstaklingar lá inni með COVID-19 í aldurshópnum 65 ára og eldri.

Staðan í Evrópu

• Í ríkjum ESB/EES er fjöldi sjúklinga sem leita til heilsugæslu með einkenni öndunarfærasjúkdóma enn lítill. Hins vegar greina flest lönd frá aukningu eins og búast má við á þessum árstíma. Hingað til hefur svipuð aukning ekki sést hjá sjúklingum sem lagðir eru inn á sjúkrahús vegna öndunarfærasýkinga.

• Útbreiðsla inflúensu og RS-veirusýkinga er enn lítil en farin að aukast. Dreifing COVID-19 er enn víðtæk en heldur áfram að minnka, sem er svipuð þróun og á sama tíma í fyrra.

• Aukning í útbreiðslu RS-veirusýkinga sést aðallega hjá börnum yngri en fimm ára, á meðan útbreiðsla inflúensu kemur helst fram hjá börnum yngri en 15 ára.

Sjá frekari upplýsingar á vef Sóttvarnastofnunar Evrópu.

Sóttvarnalæknir minnir fólk á að:

• Þiggja inflúensubólusetningu ef í forgangs- eða áhættuhópi.

• Þiggja RSV mótefni fyrir þau ungbörn sem það á við.

• Vera heima á meðan þú hefur einkenni og þangað til vel á batavegi og hitalaus í sólarhring.

• Sýna sérstaka varúð í nánd við viðkvæma einstaklinga ef þú ert með einkenni sýkingar.

• Lágmarka umgengni við aðra sem eru með einkenni sýkingar.

• Hylja munn og nef við hósta og hnerra.

• Þvo hendur oft og vel.

• Þrífa sameiginlega snertifleti og lofta út í sameiginlegum rýmum eins og hægt er.

• Íhuga notkun andlitsgrímu eftir aðstæðum.

Sóttvarnalæknir