Öndunarfærasýkingar – Vika 11 2025

Staðan á Íslandi

Fjöldi greininga á bæði inflúensu og RS-veirusýkingu stefnir áfram niður á við og fáir greinast með COVID-19. Fjöldi greininga á öðrum öndunarfæraveirum var minni í viku 11 samanborið við undangengnar vikur. Enginn greindist með kíghósta í viku 11 en stöku tilfelli hafa greinst frá áramótum.

Inflúensa, RS-veirusýking og COVID-19

Fjöldi greininga á inflúensu stefnir rólega niður á við. Samtals greindust 26 einstaklingar í viku 11, þar af 17 með inflúensutegund A(pdm09), fimm með tegund A(H3) og fjórir með inflúensutegund B. Þeir sem greindust voru í öllum aldurshópum en einn einstaklingur var undir fimm ára aldri, einn var í aldurshópnum 5–14 ára, 14 voru 15–64 ára og tíu voru 65 ára eða eldri.

Ellefu einstaklingar voru inniliggjandi á Landspítala með inflúensu í viku 11, þar af átta í aldurshópnum 65 ára og eldri, tveir á aldrinum 15–64 ára og eitt barn á aldrinum 3–4 ára. Þá dvöldu níu einstaklingar á bráðamóttökum í lengri eða skemmri tíma með inflúensu.

Fjöldi greindra RS-veirusýkinga fer áfram lækkandi. Í viku 11 greindust þrír einstaklingar, þar af tveir í aldurshópnum 65 ára og eldri og eitt barn 3–4 ára. Tveir lágu á Landspítala með RS-veirusýkingu, báðir í aldurshópnum 65 ára og eldri.

Tveir einstaklingar greindust með COVID-19 í viku 11, einn á aldrinum 15–64 ára og eitt barn undir fimm ára. Enginn lá á Landspítala með COVID-19.

Aðrar öndunarfærasýkingar

Færri greindust með öndunarfæraveirur, aðrar en inflúensu, RSV og SARS-CoV-2, í viku 11 samanborið við undangengnar vikur. Áfram greinist stærstur hluti með rhinoveiru (kvef). Öndunarfærasýnum sem rannsökuð eru hefur fækkað undanfarnar vikur en í viku 11 var fjöldinn 175. Hlutfall jákvæðra sýna hefur sveiflast frá ársbyrjun og var það 36% í viku 11.

Greiningum á Mycoplasma bakteríusýkingu (greiningar lækna óháð rannsóknarniðurstöðu) hefur fækkað frá áramótum en í viku 11 greindist einn einstaklingur. Enginn greindist með kíghósta í viku 11.

Staðan í Evrópu

• Áfram er talsvert um öndunarfærasýkingar í ríkjum ESB/EES.

• Inflúensufaraldur, þar sem inflúensutegund A hefur verið ríkjandi, virðist hafa náð hámarki og fer sjúkrahúslegum vegna inflúensu fækkandi.

• Staðan á RS-veirusýkingum er enn misjöfn eftir ríkjum en almennt fer tíðnin lækkandi.

• Tíðni COVID-19 (SARS-CoV-2 sýkinga) er mjög lág í flestum ríkjum ESB/EES.

Sjá frekari upplýsingar á vef Sóttvarnastofnunar Evrópu.

Almennar sóttvarnir, við minnum á að:

• Varast umgengni við aðra sem eru með einkenni sýkingar.

• Vera heima á meðan þú hefur einkenni og þangað til vel á batavegi og hitalaus í sólarhring.

• Hylja munn og nef við hósta og hnerra.

• Sýna sérstaka varúð í nánd við viðkvæma einstaklinga ef þú ert með einkenni sýkingar.

• Þvo hendur oft og vel.

• Þrífa sameiginlega snertifleti og lofta út í sameiginlegum rýmum eins og hægt er.

• Íhuga notkun andlitsgrímu í fjölmenni.

• Grímunotkun í heilbrigðisþjónustu á meðan inflúensufaraldur er í hámarki getur dregið úr útbreiðslu til viðkvæmra einstaklinga.

Öndunarfærafréttir koma næst út eftir tvær vikur og þá fyrir vikur 12 og 13.

Sóttvarnalæknir