Reglugerð um skýrslugerð vegna sóttvarna.

I. KAFLI Um skráningarskyldu.

1. gr.

Sóttvarnalæknir er ábyrgur fyrir því að haldin sé sjúkdómaskrá sem tekur til smitsjúkdóma, sjúkdómsvalda þeirra, sjúkdóma af völdum eiturefna og geislavirkra efna, óvenjulegra og óvæntra atburða sem geta haft alvarlegar heilsufarslegar afleiðingar meðal þjóða heims, sýklalyfjanotkunar og bólusetninga (ónæmisaðgerða), sbr. reglugerð um bólusetningar á Íslandi. Gæta skal fyllsta trúnaðar um allar einkalífsupplýsingar sem fram koma í smitsjúkdómaskrá og gilda um skrána sömu reglur og aðrar sjúkraskrár. Ýtrustu varúðar skal gætt við meðferð, vörslu og sendingu upplýsinga um tilkynningarskylda sjúkdóma.

Til að halda skrá um sýklalyfjanotkun kallar sóttvarnalæknir eftir upplýsingum úr lyfjagagnagrunni landlæknis og frá sjúkrastofnunum. Þær upplýsingar mega ekki bera með sér önnur persónuauðkenni en aldur, kyn og búsetu samkvæmt póstnúmeri þeirra sem lyfjunum hefur verið ávísað á, sérgrein læknis, sjúkrastofnun og deild þar sem sjúkrastofnun er deildaskipt. Upplýsingar um sýklalyfjanotkun skulu vera ópersónugreinanlegar. Forstöðumönnum heilbrigðisstofnana er skylt að senda sóttvarnalækni upplýsingar um magn sýklalyfja sem notað er á viðkomandi stofnun, skipt eftir deildum þar sem það á við.

Sóttvarnalæknir gefur nánari fyrirmæli um tilhögun skráningar og tilkynninga í smitsjúkdómaskrá og skrá um sýklalyfjanotkun, meðal annars um hvaða ráðstafanir skuli viðhafðar til að tryggja öryggi persónuupplýsinga varðandi tilkynningarskylda sjúkdóma.

2. gr.

Þeir sjúkdómar, sjúkdómsvaldar og atburðir sem sóttvarnalög fjalla um eru skráningarskyldir og geti þeir ógnað almannaheill eru þeir jafnframt tilkynningarskyldir.

Með skráningarskyldu er átt við skyldu til að senda sóttvarnalækni ópersónugreindar upplýsingar en með tilkynningarskyldu er átt við skyldu til að senda persónugreindar upplýsingar um sjúkdómstilvik.

3. gr.

Læknum er skylt að skrá upplýsingar um skráningar- og tilkynningarskylda sjúkdóma á þar til gerð eyðublöð eða með rafrænum hætti samkvæmt nánari fyrirmælum sóttvarnalæknis, sbr. 1. gr. Sama gildir um forstöðumenn rannsóknastofa, sjúkradeilda og annarra heilbrigðisstofnana. Skrá um smitsjúkdóma skal senda sóttvarnalækni mánaðarlega eða oftar ef hann telur þörf á því.

Læknum og hjúkrunarfræðingum er skylt að skrá í sjúkraskrá samkvæmt nánari fyrirmælum sóttvarnalæknis, sbr. 1. gr., allar bólusetningar sem þeir framkvæma. Læknar tilkynna sóttvarnalækni um bólusetningar sem gerðar hafa verið.

II. KAFLI Skráningarskyldir sjúkdómar.

4. gr.

Skráningarskyldir sjúkdómar eru:

Skráningarskyldir sjúkdómar eru:

adenóveirusýking
afbrigðilegar berklasýkingar
barkakýlisbólga
berkjubólga
berkjulungnabólga
bráður niðurgangur
clostridium difficile sýking
efri loftvegasýking
enteróveirusýking
eyrnabólga
flatlús
hálsbólga
heilabólga (encephalitis/meningoencephalitis)
heilahimnubólga af völdum sýkla
heilahimnubólga af óþekktum toga
höfuðlús
kláðamaur
kynfæravörtur (condyloma genitalis)
lungnabólga
Lyme sjúkdómur (borreliosis)
matareitrun af völdum sýkla eða eiturefna þeirra
metapneumóveirusýking
njálgur
nóróveirusýking (calicíveirusýking)
parainflúensa
psittacosis
skarlatssótt
skútabólga
speldisbólga (epiglottitis)
sýkingar af völdum fjölónæmra sýkla
þvagrásarbólga af óþekktri orsök

III. KAFLI Tilkynningarskyldir sjúkdómar, sjúkdómsvaldar þeirra og atburðir sem ógna heilsu manna.

5. gr.

Tilkynningarskyldir sjúkdómar eru:

alnæmi (AIDS)
bandormslirfusýki (cysticercosis)
barnaveiki (diphteria)
beinbrunasótt (dengue)
berklar
blæðandi veiruhitasóttir
bólusótt
bótúlismi
bráð sjúkdómseinkenni af völdum eiturefna og geislavirkra efna, sem geta ógnað almannaheill
Candida auris sýking
Creutzfeldt Jacob veiki og afbrigði hennar
enteróhemórrhagísk E. coli sýking
gulusótt
Haemophilus influenzae sýking, ífarandi
hettusótt
hérasótt (tularemia)
HIV-sýking
holdsveiki
huldusótt (Q-fever)
kampýlóbaktersýking
kíghósti
klamýdíusýking (Chlamydia trachomatis, þ.m.t. LGV/klamydíueitlafár)
kólera og kólerulíkar sýkingar (vibriosis og líkir sýkingavaldar)
kórónuveirur SARS-CoV, MERS
legíónellusýking
lekandi (gonorrhea)
lifrarbólga A (bráð)
lifrarbólga B (bráð, viðvarandi)
lifrarbólga C
lifrarbólga D og E
listeríusýking
Lyssaveirusýking (hundaæði)
lömunarveiki (mænusótt, polio)
meningókokkasjúkdómur, ífarandi
miltisbrandur (anthrax)
mislingar
mítilborin heilabólga (tick-borne viral encephalitis)
MPX veirusýking (apabóla)
óvæntir atburðir sem ógnað geta heilsu manna (óvænt aukning sjúkdómstilvika eða dauðsfalla) og eru bráð ógn
við lýðheilsu
pneumokokkasýking, ífarandi
rauðir hundar (einnig meðfæddir)
salmonellusýking
sárasótt (einnig meðfædd eða nýburasýking)
shígellusýking
stífkrampi (tetanus)
streptókokkasýking, ífarandi (Streptococcus pyogenes)
sullaveiki
svarti dauði
sýkingar tengdar heilbrigðisþjónustu
taugasjúkdómur vegna borrelia burgdorferi (lyme neuroborreliosis)
toxóplasmasýking, meðfædd
tríkínusýking
zíkaveirusýking, áunnin eða meðfædd
öldusótt (brucellosis)

Tilkynningarskyldir sjúkdómar sem nægjanlegt er að rannsóknarstofur tilkynna til sóttvarnalæknis:

breiðvirkir betalaktamasamyndandi sýklar (BBL)
Chikungunya veirusýking
giardíasýking
inflúensa
kórónuveira SARS-CoV-2
launsporasýking (cryptósporidium sýking)
malaría
meticillín ónæmur Staphylococcus aureus (MÓSA)
RS veirusýking
taugaveiki/taugaveikibróðir
vancómýcín ónæmir enterókokkar (VRE)
vesturnílarveirusótt

Tilkynningarskyldir sjúkdómar sem nægjanlegt er að tilkynna ef sjúklingur er lagður inn á sjúkrahús:

hlaupabóla
ristill (herpes zoster)
rótaveirusýking

6. gr.

Tilkynningu um tilkynningarskyldan sjúkdóm, sjúkdómsvald eða óvænta atburði sem ógnað geta heilsu manna skal senda sóttvarnalækni án tafar eða samkvæmt nánari fyrirmælum hans. Sóttvarnalækni er heimilt að fela göngudeildum smitsjúkdóma og rannsóknarstofum, sbr. ákvæði reglugerðar um sóttvarnarráðstafanir, að halda skrá yfir tilkynningarskyld sjúkdómstilfelli og sjúkdómsvalda.

Á eyðublaði skal meðal annars koma fram:

1. Heiti sjúkdóms eða sjúkdómsvalds og greiningarnúmer samkvæmt alþjóðlegu sjúkdóma- og dánarmeinaskránni sem gildir hverju sinni.
2. Hvenær, hvernig og hvaða sjúkdómsgreining eða greining sjúkdómsvalds var staðfest.
3. Persónuauðkenni og kyn hins sýkta.
4. Í hvaða sóttvarnaumdæmi hinn sýkti býr, þ.e. dvalarstaður.
5. Nafn tilkynnanda, læknisnúmer, vinnustaður, undirskrift og dagsetning tilkynningar.

7. gr.

Bólusetningar eru tilkynningarskyldar, sbr. reglugerð um bólusetningar á Íslandi.

IV. KAFLI Gildistaka.

8. gr.

Reglugerð þessi, sem sett er með stoð í 18. gr., sbr. 3. gr., sóttvarnalaga nr. 19/1997, öðlast þegar gildi. Jafnframt fellur úr gildi reglugerð nr. 420/2008.

Reglugerð þessi er sett með hliðsjón af ákvörðunum framkvæmdastjórnar nr. 2000/96/EB og 2009/312/EB.