Milliganga um sölu, umboðs- og umsýslusala eða endursala á vörum og þjónustu sem skattskyld er í 24% skatthlutfallinu er jafnframt virðisaukaskattsskyld í sama skatthlutfalli. Sem dæmi má í þessu sambandi nefna sölu minjagripa, milligöngu um leigu eða leigu í eigin nafni á aðstöðu fyrir veitingar, leigu á bifreið eða öðru lausafé, t.d. fjórhjóli og vélsleða án stjórnanda, þ.e. þegar ekki er um að ræða leigu í tengslum við skipulagða ferð undir leiðsögn fararstjóra, sbr. kafla 2.1.

Milliganga um sölu eða afhendingu, þ.m.t. þóknun fyrir umboðs- og umsýslusölu, og endursala á vörum og þjónustu sem skattskyld er í 11% skatthlutfallinu sem og milliganga um sölu eða afhendingu á undanþeginni þjónustu er skattskyld í 11% hlutfallinu. Dæmi um starfsemi sem fellur hér undir er t.a.m. milliganga um sölu eða sala í eigin nafni á gistiþjónustu, veitingaþjónustu, skattskyldum fólksflutningum og milliganga um sölu á veiðileyfum í ár og vötn og aðgangi að söfnum, tónleikum og íþróttaviðburðum.

Þjónusta ferðaskrifstofa og ferðaskipuleggjenda að því leyti sem hún varðar fólksflutninga milli landa annars vegar, s.s. sölu sólarlandaferða eða viðskiptaferða, og vöru eða þjónustu sem ferðamaður nýtir utan Íslands hins vegar telst ekki til skattskyldrar veltu, þ.e. sú sala ber í raun núll skatt. Enginn útskattur er því innheimtur af þessum viðskiptum en innskattsréttur er fyrir hendi. Hafi ferðaskrifstofa eða ferða skipuleggjandi eingöngu með höndum viðskipti af þessum toga ber þeim engu að síður skylda til að tilkynna um starfsemi sína til Skattsins til skráningar á virðisaukaskattsskrá sbr. kafli 7.

Hafi ferðaskrifstofur eða ferðaskipuleggjendur með höndum kaup og endursölu, umboðs- eða umsýslusölu á þjónustu sem undanþegin er virðisaukaskatti, er slík sala einnig undanþegin virðisaukaskatti, s.s. sala veiðileyfa í ár og vötn og sala á aðgangi að söfnum, tónleikum og íþróttaviðburðum. Milliganga um undanþegna þjónustu er hins vegar skattskyld í 11% skatthlutfallinu sbr. framangreint. Hafi ferðaskrifstofa eða ferðaskipuleggjandi með höndum annarskonar starfsemi en að framan greinir er hún skattskyld í 24% skatthlutfallinu nema starfsemin sé sér staklega felld undir 11% skatthlutfallið eða er undanþegin virðisaukaskatti.