Þar sem börn í 1. bekk eru langflest að hefja formlegt lestrarnám er mikilvægt að skoða þau gögn sem liggja fyrir varðandi forsendur þeirra að takast á við lestrarnám. Mikilvægt er að kennarar hafi kynnt sér niðurstöður skimana úr leikskóla áður og safni viðbótargögnum með því að biðja forsjáraðila um að fylla út Bakgrunnsupplýsingar vegna lestrarnáms: Gátlisti fyrir foreldra/forráðamenn við upphaf skólagöngu. Gátlistinn er einnig til á pólsku og ensku. Þessar upplýsingar eru mjög dýrmætar þar sem þær segja til um hvaða börn eru líkleg til að þurfa stuðning og eftirfylgni, ekki seinna meir, heldur strax.

Í flestum skólum leggja umsjónarkennarar 1. bekkjar skimunina fyrir. Þar sem nemendur eru ungir og ekki vanir því að leysa verkefni af þessu tagi getur hins vegar verið gott að hafa aukahendur til að styðja bæði við nemendur og umsjónarkennara á meðan skimunin er lögð fyrir. Þá er hægt að tryggja að allir fái þá aðstoð sem þeir þurfa og minnka líkur á að eitthvað misfarist, t.d. við úrlausn verkefna.

Mælt er með því að allir nemendur séu skimaðir og öllum nemendum gert kleift, með aðstoð ef þarf, að sýna fram á færni sína. Þess þarf þó að gæta að aðstoðin hafi ekki áhrif á það hvernig nemendur leysa verkefnin í skimuninni.

Í Leiðbeiningunum um fyrirlögn má finna allar hagnýtar upplýsingar sem snúa að fyrirlögn skimunarinnar. Leiðbeiningarnar, ásamt öðrum prófgögnum, má finna undir hnappnum Prófgögn í viðmóti Matsferils. Með því að smella á hann birtist fellilisti yfir öll nauðsynleg prófgögn sem kennari þarf að nota við fyrirlögn skimunarinnar.

Þar sem um prófgögn er að ræða eru þau eingöngu aðgengileg í gegnum viðmótið á meðan fyrirlagnarglugginn er opinn. Mikilvægt er að öll prófgögn séu vandlega varðveitt innan skóla sé þeim hlaðið niður.