Endurtekning á efni á mismunandi síðum getur tafið eða villt um fyrir notandanum og það eykur líkur á að hann fari að leita upplýsinga eftir öðrum leiðum, til dæmis í gegnum tölvupóst eða síma.

Þess vegna þurfum við ávallt að kynna okkur vel hvaða efni er þegar birt á Ísland.is vefnum um viðfangsefnið sem þú hefur í huga, vita hvaða stofnanir eiga það efni og hvaða orðfæri þær nota.

Mögulega þarf að yfirfara þann texta með hliðsjón af þeim viðbótum sem felast í þeim upplýsingum sem þú vilt miðla. Tvítekið efni skilar verri leitarniðurstöðum, ruglar notandann og skaðar þannig trúverðugleika vefsins í heild.

Stór hluti notenda kemur inn á vefinn í gegnum leitarvélar en aðrir nýta sér þjónustuflokka sem saman mynda leiðakerfi Ísland.is. Það er mikilvægt að efni sé vel og rétt flokkað til þess að leiða notendur á rétta staði.

Við ættum því ávallt að vita hvaða þjónustuflokki efnið tilheyrir áður en við byrjum að skrifa efni sem birtast á í leiðakerfinu.

Lykilorð eru hugtök eða setningar sem tryggja að notendur finni efnið sem gagnast þeim. Til að lykilorð skili árangri þurfa þau að birtast á réttum stöðum í efninu.

Orðalag notenda verður að vera sýnilegt í textanum, það hjálpar notendum, leitarvélum og gervigreindartólum að skilja efnið.

Við finnum lykilorð með því að skoða hvernig notendur tala um og leita að þjónustu, til dæmis með:

• leitargögnum af vef eða leitarvélum,

• notendarannsóknum og viðtölum,

• greiningu á algengum spurningum til stofnana,

• prófun á efni með notendum.

Hvernig tryggjum við sýnileika lykilorða í efninu?