Uppfært mælaborð um bið eftir hjúkrunarrými

Mælaborðið inniheldur upplýsingar um fjölda sem beið eftir hjúkrunarrými og fjölda sem flutti í hjúkrunarrými á hverjum ársfjórðungi, biðtíma þeirra sem fluttu í hjúkrunarrými á ári hverju og fjölda hjúkrunarrýma í hverju heilbrigðisumdæmi.

Meðalfjöldi sem beið eftir hjúkrunarrými á þriðja ársfjórðungi ársins 2023 var 482 sem er sambærilegur þeim fjölda sem beið á öðrum ársfjórðungi. Heldur færri biðu á fyrsta ársfjórðungi sem og á fjórða ársfjórðungi ársins 2022. Fleiri konur en karlar biðu líkt og áður. Hlutfallslega biðu flestir á Vesturlandi og fæstir á Austurlandi. Á fyrstu níu mánuðum ársins 2023 fluttu 703 einstaklingar í hjúkrunarrými. Á sama tímabili á árinu 2022 fluttu 776 í hjúkrunarrými.

Samkvæmt Starfsemisupplýsingum Landspítala biðu 77 einstaklingar með gilt færni- og heilsumat á Landspítala eftir útskriftarúrræði (þ.e. höfðu lokið sjúkrahússmeðferð) í lok september, 17% færri en á sama tíma á árinu 2022.

Í skýrslu frá Heilbrigðisráðuneytinu frá árinu 2021 um stöðu framkvæmdaáætlunar um byggingu hjúkrunarrýma kom fram að fjölga ætti hjúkrunarrýmum um 250 á höfuðborgarsvæðinu til viðbótar við þau verkefni sem þegar voru á gildandi framkvæmdaáætlun (622 ný rými og bætt aðstaða í 259 rýmum). Von er á uppfærðri framkvæmdaáætlun á næstunni.

Frekari upplýsingar:
Kjartan Hreinn Njálsson, aðstoðarmaður landlæknis
kjartan.h.njalsson@landlaeknir.is