Opnað fyrir sölu á íbúðarhúsnæði í Grindavík

Íbúar í Grindavík sem óska eftir því að selja ríkissjóði íbúðarhúsnæði sitt í gegnum Fasteignafélagið Þórkötlu, samkvæmt nýsamþykktum lögum Alþingis, geta nú fyllt út umsókn á Ísland.is.

Gert er ráð fyrir að vinnsla umsókna taki um 2-4 vikur, með fyrirvara um fjölda umsókna og umfang við vinnslu þeirra, sem gera má ráð fyrir að verði mismunandi eftir eignum. Eigendur um 900 íbúða í Grindavík geta nýtt sér úrræðið.

Rúmur tími verður gefinn til þess að sækja um að selja íbúðarhúsnæði, eða til áramóta.
Fjármála- og efnahagsráðherra hefur jafnframt undirritað samkomulag við helstu lánveitendur húsnæðislána í Grindavík um yfirtöku áhvílandi lána á því húsnæði sem keypt verður af íbúum Grindavíkur og endurfjármögnun þeirra í samræmi við samkomulagið.

Þau sem ekki geta nýtt sér stafræna umsókn er bent á að hafa samband í gegnum samskiptaform en haft verður sambandi við fólk í framhaldinu.

Umsókn um sölu íbúða í Grindavík á Ísland.is

Nánari upplýsingar um ferlið á Ísland.is.