Bólusetning gegn árlegri inflúensu

Inflúensubóluefni verður tilbúið til afhendingar frá dreifingaraðila frá og með 13. september nk. Bóluefni sem notað verður í bólusetningum veturinn 2022-2023 samkvæmt samningum sóttvarna­læknis við Vistor er:

• Vaxigrip Tetra  – 90.000 skammtar skv. samningi við útboð 2019 og viðaukasamningum 2021.

Ónotuðum skömmtum var fargað í vor og var því pantað minna bóluefni í ár en í fyrra.

Í ár verður dreifingu forgangsraðað til heilbrigðisstofnana og hjúkrunarheimila í september og þess er vænst að bólusetningar geti hafist um allt land 15. september en aðrir sem fá úthlutað bóluefni fá það væntanlega í október, þ.m.t. aðilar sem sinna vinnustaðabólusetningum.

Dreifing bóluefnis til aðila sem sinna bólusetningum miðast við það magn sem óskað var eftir eða pantað sl. vetur nema annað hafi komið fram í samskiptum sóttvarnalæknis við ábyrgðaraðila bólusetninga.

Sóttvarnalæknir mælist til að eftirtaldir áhættuhópar njóti forgangs við inflúensubólusetningar:

• Allir einstaklingar 60 ára og eldri.

• Öll börn og fullorðnir sem þjást af langvinnum hjarta-, lungna-, nýrna- og lifrarsjúkdómum, sykursýki, illkynja sjúkdómum og öðrum ónæmisbælandi sjúkdómum.

• Barnshafandi konur.       

• Heilbrigðisstarfsmenn sem annast einstaklinga í áhættuhópum sem taldir eru upp hér að ofan.

Sjá nánar Dreifibréf nr. 4/2022 um bólusetningu gegn árlegri inflúensu

Sóttvarnalæknir