27. september 2023
27. september 2023
Sjúkratryggingar hljóta verðlaun fyrir stafræna þróun
Á ráðstefnunni Tengjum ríkið sem fram fór föstudaginn 22. september síðastliðinn fengu Sjúkratryggingar verðlaun á sviði stafvæðingar sem veitt eru fyrir opinbera aðila sem nýta opin og sameiginleg tól sem þróuð hafa verið af Stafrænu Íslandi
![](https://images.ctfassets.net/8k0h54kbe6bj/2eOJf9JeD4BZMOBDREwRcT/90de17f20ceacbc38a0b3c78e4bfbdb7/stafraent23-21.jpg?w=50&fm=webp&q=80)
![Viðurkenning fyrir sex stafræn skref](https://images.ctfassets.net/8k0h54kbe6bj/2eOJf9JeD4BZMOBDREwRcT/90de17f20ceacbc38a0b3c78e4bfbdb7/stafraent23-21.jpg?w=774&fm=webp&q=80)
Verðlaunin bera heitið Stafræn skref og voru fyrst veitt árið 2022. Stafrænu skrefin eru níu talsins og hafa Sjúkratryggingar þegar náð átta skrefum og það níunda er á leiðinni.
Af þeim átta stafrænu skrefum sem Sjúkratryggingar hafa náð má nefna innleiðing á nýrri heimasíðu á Ísland.is sem fór í loftið fyrir rúmu ári síðan. Við heimasíðuna hafa bæst við þjónustusíða og spjallmennið Askur. Heimasíða Sjúkratrygginga er mest sótti vefur stofnana á Ísland.is. Þjónustusíðan og spjallmennið hafa bætt þjónustu stofnunarinnar til muna og viðtökur hafa verið með ágætum.
Á mínum síðum á Ísland.is er kominn nýr flokkur Heilsa. Þar undir hafa Sjúkratryggingar komið inn upplýsingum sem áður voru í Réttindagátt um tannlækna, heilsugæslu, sjúkraþjálfun, iðjuþjálfun, talþjálfun, hjálpartæki og næringu. Á næstu vikum bætast við upplýsingar um lyf og greiðsluþátttöku. Þar að auki hafa Sjúkratryggingar innleitt stafræna pósthólfið á Ísland.is.
Sjúkratryggingar tóku þátt í þróun á umsóknarkerfi á Ísland.is og áttu fyrstu umsóknina sem kom inn í kerfið. Í dag eru umsóknirnar orðnar þrjár, það er umsókn um sjúkratryggingu, tilkynning um slys og svo umsókn um evrópskt sjúkratryggingakort. Umsókn um evrópska sjúkratryggingakortið er langstærsta umsóknin í umsóknarkerfinu á Ísland.is þegar litið er til fjölda.
Einnig hafa Sjúkratryggingar innleitt strauminn (X-Road) og telja vefþjónustur sem stofnunin hefur komið upp á annan tug. Straumurinn er nýttur til að birta gögn á Mínum síðum á Ísland.is ásamt því að miðla gögnum til Embætti landlæknis, Landspítala og Vinnueftirlitsins.
Síðast en ekki síst hafa Sjúkratryggingar innleitt „Innskráningu fyrir alla“ og umboðskerfi á Ísland.is á móti Réttindagátt og Gagnagátt.
Í vinnslu er svo að koma ýmsum upplýsingum frá Sjúkratryggingum inn í Ísland.is app-ið.
Nánar má lesa um viðurkenningarhafa á heimasíðu Ísland.is.