Dvalarleyfi vegna atvinnu

Umsækjandi verður að sýna fram á að framfærsla hans sé trygg þann tíma sem hann sækir um að dveljast hér á landi. Trygg framfærsla þýðir að hafa næg fjárráð til að geta séð fyrir sér sjálfur.

Útlendingastofnun er heimilt að afla skattframtala og gagna frá skattayfirvöldum til staðfestingar á tryggri framfærslu.

Upphæð

Útlendingastofnun miðar við að mánaðarleg fjárráð umsækjenda séu að lágmarki:

• 247.572 krónur fyrir einstaklinga.

Viðmiðin samsvara grunnfjárhæð fjárhagsaðstoðar Reykjavíkurborgar, sjá reglur um fjárhagsaðstoð. Upphæðir miðast við tekjur fyrir skatt.

Tímabil

Framfærsla útlendings þarf að vera trygg á gildistíma dvalarleyfis. Það þýðir að verði dvalarleyfi gefið út til eins árs þarf að sýna fram á trygga framfærslu fyrir eitt ár.

Hvað telst ekki trygg framfærsla

• Greiðslur í formi félagslegrar aðstoðar ríkis eða sveitarfélags (aðrar en húsnæðisbætur). Hafi umsækjandi þegið slíkan styrk og getur ekki sýnt fram á fullnægjandi framfærslu með öðrum hætti, verður dvalarleyfi synjað.

• Meðlagsgreiðslur og barnalífeyrir þar sem þeim er ætlað að standa undir framfærslu barns.

• Framfærsla þriðja aðila, í öðrum tilvikum en fram kemur framar í þessari umfjöllun

• Eignir aðrar en bankainnstæður (til dæmis fasteignir) og arður af fyrirtækjum, vextir eða aðrar greiðslur sem ekki er tryggt hvort eða hvenær eru lausar til útborgunar

• Reiðufé telst ekki fullnægjandi staðfesting á framfærslu.

Leggja þarf fram staðfestingu á því að umsækjandi hafi keypt sjúkratryggingu

• sem gildir á Íslandi,

• í minnst sex mánuði frá skráningu lögheimilis umsækjanda á Íslandi,

• að lágmarksupphæð 2.000.000 kr.

Sex mánuðum eftir skráningu lögheimilis á Íslandi verður dvalarleyfishafi sjálfkrafa sjúkratryggður á Íslandi.

Þegar sótt er um dvalarleyfi mega ekki liggja fyrir atvik sem valdið geta því að umsækjanda verði meinuð landganga eða dvöl hér á landi.

Þetta þýðir að þú mátt ekki

• hafa á síðustu fimm árum afplánað refsingu erlendis eða verið dæmdur þar til refsingar fyrir háttsemi sem að íslenskum lögum getur varðað fangelsi lengur en þrjá mánuði

• hafa verið dæmdur hér á landi til refsingar eða til að sæta öryggisráðstöfunum fyrir háttsemi sem getur varðað fangelsi lengur en þrjá mánuði eða oftar en einu sinni verið dæmdur til fangelsisrefsingar á síðustu þremur árum

Samkvæmt lögum um atvinnuréttindi útlendinga þarf sérfræðiþekking umsækjanda að

• vera nauðsynleg atvinnurekandanum og

• fela í sér háskóla-, iðn-, list- eða tæknimenntun sem viðurkennd er hér á landi.

Mikilvægt er að kynna sér vel frekari skilyrði fyrir veitingu atvinnuleyfis vegna starfs sem krefst sérfræðiþekkingar á heimasíðu Vinnumálastofnunar.

Samkvæmt lögum um atvinnuréttindi útlendinga er skilyrði að starfsfólk fáist hvorki á innlendum vinnumarkaði né á EES/EFTA-svæðinu eða Færeyjum.

Mikilvægt er að kynna sér vel frekari skilyrði fyrir veitingu atvinnuleyfis vegna skorts á starfsfólki á heimasíðu Vinnumálastofnunar.   

Samkvæmt lögum um atvinnuréttindi útlendinga er skilyrði að starfið sé vegna starfa íþróttafólks hjá íþróttafélagi innan Íþrótta- og Ólympíusambands Íslands. Á heimasíðu sambandsins má finna yfirlit yfir aðildarfélögin.

Mikilvægt er að kynna sér vel frekari skilyrði fyrir veitingu atvinnuleyfis fyrir íþróttafólk á heimasíðu Vinnumálastofnunar.

Samkvæmt lögum um atvinnuréttindi útlendinga er skilyrði að starfið sé vegna sérhæfðra starfa á vegum atvinnurekanda sem ekki hefur starfsstöð hér á landi. Jafnframt er skilyrði að fyrir liggi samstarfssamningur um kennslu-, fræði- eða vísindastörf eða þjónustusamningur á milli erlends þjónustufyrirtækis og innlends notendafyrirtækis.

Mikilvægt er að kynna sér vel frekari skilyrði fyrir veitingu atvinnuleyfis fyrir sérhæfða starfsmenn á grundvelli samstarfs- eða þjónustusamnings á heimasíðu Vinnumálastofnunar.