Afgreiðslutími endurnýjunar er að hámarki 90 dagar frá því að fullnægjandi gögn hafa borist, nema um flóknari umsóknir sé að ræða sem þarfnast frekari vinnslu. Ef þú sendir fullnægjandi fylgigögn með umsókn tekur vinnslan almennt styttri tíma.
Ef þú uppfyllir áfram skilyrðin fyrir dvalarleyfi, verður leyfið þitt endurnýjað og þú færð nýtt dvalarleyfiskort.
Þegar kortið þitt fer í framleiðslu munum við senda þér skilaboð innan viku með upplýsingum um hvert þú getur sótt kortið.
Myndataka ef mynd er of gömul
Ef myndin sem við eigum af þér er eldri en fjögurra ára getum við ekki notað hana til að panta nýtt kort. Þú verður þá látin/látinn vita að þú þurfir að mæta í myndatöku í afgreiðslu Útlendingastofnunar eða á skrifstofu sýslumannsembættis utan höfuðborgarsvæðis.
Það er nauðsynlegt að panta tíma í myndatöku hjá Útlendingastofnun. Mundu að taka með þér vegabréf til að sanna hver þú ert.
Ef þú uppfyllir ekki skilyrði fyrir endurnýjun dvalarleyfis er umsókninni synjað. Það þýðir að þú færð ekki það dvalarleyfi sem þú sækir um. Synjanir umsókna um dvalarleyfi eru skriflegar stjórnvaldsákvarðanir sem má kæra til kærunefndar útlendingamála innan 15 daga frá þeim degi sem þú móttekur synjun.
