Áhættumat á vinnustöðum
Taktu fimm - til öryggis fyrir þig og þína
Áður en hafist er handa við hvers kyns vinnu er æskilegt að gera eigið áhættumat. Þetta á sérstaklega við á vinnustöðum þar sem aðstæður breytast dag frá degi eða þar sem verk eru unnin sjaldan.
Gefðu þér tíma og taktu fimm skref til öryggis fyrir þig og þína.
Skrefin eru:
Hinkraðu og hugsaðu um verkið sem er framundan. Ertu með góða áætlun í huga um hvernig þú ætlar að framkvæma verkið?
Horfðu í kringum þig og áttaðu þig á mögulegum áhættum við verkið. Spyrðu þig "hvað ef" spurninga, eins og til dæmis: Hvað gerist ef stiginn rennur? Hvað gerist ef það er engin hlíf á vélinni og eitthvað festist í henni?
Leggðu mat á áhættuna: Hverjir eru í hættu? Hvað er það versta sem mögulega getur gerst? Hvað ertu að gera nú þegar til að draga úr áhættunni? Hvað getur þú gert meira til að draga úr áhættunni?
Stýrðu áhættunni: Getur þú fjarlægt áhættuna alveg? Ef ekki; getur þú dregið úr henni með því að hugsa verkefnið upp á nýtt, nota önnur verkfæri, nota hættuminni efni eða bæta við persónuhlífum?
Byrjaðu að vinna og haltu áfram að fylgjast með mögulegum áhættum í vinnuumhverfinu.
Hvað vinnst með því að taka fimm skref til öryggis?
Það dregur úr líkum á slysum og óhöppum.
Öryggismenning á vinnustað verður betri með virkari þátttöku starfsfólks.
Verkefnið gengur betur þegar búið er að leggja mat á mögulegar áhættur fyrir fram og bregðast við þeim.
Gerðu þér greiða taktu fimm:
Taktu 5 til útprentunar
Hér að neðan má nálgast einblöðung í stærðinni A5 um Taktu 5 sem er velkomið að prenta út eða dreifa rafrænt til starfsfólks.
Þjónustuaðili
Vinnueftirlitið