Skattskylda af tekjum milli landa

Hlusta

Þegar einstaklingur er með tekjur eða eignir í einu landi en býr í öðru gilda ákveðnar reglur um skattskyldu og skattgreiðslur milli landa.

Allar tekjur sem eiga uppruna á Íslandi eru skattskyldar hér, óháð því hvar einstaklingar búa. Þessar tekjur þarf því að gefa upp í skattframtali á Íslandi.

Tekjur greiddar milli landa geta verið skattskyldar í báðum löndum og mörg ríki hafa gert samninga sín á milli um það hvernig skattgreiðslur skiptast á milli þeirra.

Ísland hefur gert marga tvísköttunarsamninga sem eiga að koma í veg fyrir að greiddur sé skattur af sömu tekjum í tveimur löndum. Þessir samningar eru mismunandi eftir löndum og stýra því hverjar endanlegar skattgreiðslur verða.

Í vissum tilvikum getur einstaklingur átt rétt á því að sækja um undanþágu eða lækkun á skattgreiðslum á grundvelli tvísköttunarsamnings.

Þrjár lykilspurningar skipta máli varðandi skattgreiðslur af tekjum milli landa:

Er einstaklingurinn með fasta búsetu á Íslandi?
Hvers konar tekjur er um að ræða?
Hvaða land er um að ræða og er í gildi samningur um skattskyldu gagnvart Íslandi (tvísköttunarsamningur)?

Almennt deila skattyfirvöld upplýsingum milli landa, en það getur verið töf á þeirri miðlun. Ef einstaklingur gætir þess að upplýsa skattyfirvöld í báðum löndum, til dæmis í skattframtali, minnkar það líkur á ofgreiðslu skatta.

Búseta ræður skattskyldu

Þau sem ekki hafa fasta búsetu á Íslandi hafa hér takmarkaða skattskyldu. Í því felst að skylda þeirra til að greiða hér skatt nær bara yfir þær tekjur sem eiga uppruna á Íslandi og skattar eru að öðru leyti greiddir í því landi sem viðkomandi býr í.

Þetta gildir til dæmis um þau sem búa erlendis, en fá héðan tekjur eða eiga hér eignir – og um einstaklinga sem starfa tímabundið á Íslandi (innan við 183 daga á tólf mánaða tímabili).

Annað gildir um þau sem hafa fasta búsetu á Íslandi eða dvelja hér lengur en hálft ár, en þá gildir almenn og ótakmörkuð skattskylda.

Dæmi um skattgreiðslur þeirra sem búa erlendis

Allar tekjur frá Íslandi eru skattskyldar hér, líka hjá einstaklingum sem búa í öðru landi. Eftirfarandi eru algeng dæmi um tekjur á milli landa sem falla undir takmarkaða skattskyldu og upplýsingar um þau áhrif sem tvísköttunarsamning geta haft.

Einstaklingur sem er búsettur erlendis en fær greiðslur frá íslenskum lífeyrissjóðum og almannatryggingum, t.d. Tryggingastofnun ríkisins og Fæðingarorlofssjóði, er skattskyldur af slíkum greiðslum hér á landi.

A: Tvísköttunarsamningur í gildi

Ef í gildi er tvísköttunarsamningur við það land sem lífeyrisþegi býr í og samningurinn felur í sér að ekki eigi að greiða skatt af greiðslunum á Íslandi er hægt að sækja um undanþágu frá skattgreiðslu og endurgreiðslu ef skattur hefur nú þegar verið greiddur:

Frekari upplýsingar og umsókn um undanþágu eða lækkun (5.49)
Ef undanþága er veitt eftir að skattur hefur verið greiddur á Íslandi þarf að óska eftir leiðréttingu gegnum skattframtal

Skila þarf íslensku skattframtali árlega, jafnvel þótt undanþága hafi verið veitt.

B: Ekki tvísköttunarsamningur

Ef ekki er í gildi tvísköttunarsamningur, eða gildandi samningur segir að Ísland megi skattleggja lífeyrisgreiðslur og greiðslur frá almannatryggingum gildir eftirfarandi:

Greiðslur eru skattlagðar samkvæmt gildandi skattþrepum og persónuafsláttur dregst frá.
Einstaklingur greiðir útsvar þess sveitarfélags sem síðasta skráða lögheimili var
Þurfi að sanna skattgreiðslurnar erlendis er hægt er að sækja um tekjuvottorð til Skattsins á eyðublaði RSK 14.10.

Lífeyrir og greiðslur frá almannatryggingum eru skattlagðar á Íslandi ef að tvísköttunarsamningur heimilar Íslandi að skattleggja þær, þá eru greiðslurnar skattlagðar samkvæmt gildandi skattþrepum og persónuafsláttur reiknast á móti.

Þegar starfað er í fjarvinnu erlendis fyrir íslenskt fyrirtæki, til dæmis frá heimili, eru þær tekjur skattskyldar á Íslandi.

A: Tvísköttunarsamningur í gildi

Ef í gildi er tvísköttunarsamningur við það land sem launþegi býr í og samningurinn nær til þeirra tekna sem um ræðir er hægt að sækja um undanþágu frá skattgreiðslu:

Frekari upplýsingar og umsókn um undanþágu eða lækkun (5.49)
Ef undanþága er veitt eftir að skattur hefur verið greiddur á Íslandi verður ofgreiddur skattur endurgreiddur við álagningu næsta árs.
Skila þarf íslensku skattframtali árlega, jafnvel þótt undanþága hafi verið veitt.

B: Ekki tvísköttunarsamningur

Ef ekki er í gildi tvísköttunarsamningur við það land sem viðkomandi býr í gildir eftirfarandi:

Greiddur er 20% tekjuskattur af tekjum, auk útsvars til þess sveitarfélags sem viðkomandi var síðast skráður í. Ef viðkomandi hefur aldrei búið á Íslandi fer útsvar eftir því hvar launagreiðandi er skráður.
Viðkomandi á ekki rétt á persónuafslætti.
Skila þarf íslensku skattframtali árlega.
Þurfi að sanna skattgreiðslurnar erlendis er hægt er að sækja um tekjuvottorð til Skattsins á eyðublaði RSK 14.10.

Einstaklingur sem er búsettur erlendis er fær tekjur frá Íslandi fyrir sjálfstæðan rekstur er skattskyldur að þeim tekjum hér á landi.

A: Tvísköttunarsamningur í gildi

Ef í gildi er tvísköttunarsamningur við það land sem verktaki býr í er hægt að sækja um undanþágu frá skattgreiðslu að því gefnu að dvöl hans hér á landi sé ekki lengri en 183 dagar á hverju 12 mánaða tímabili:

Frekari upplýsingar um undanþágu og umsókn (5.42)
Ef undanþága er veitt eftir að skattur hefur verið greiddur á Íslandi verður ofgreiddur skattur endurgreiddur við álagningu næsta árs. Upplýsingar um endurgreiðslu og umsókn (5.43)

B: Ekki tvísköttunarsamningur

Ef ekki er í gildi tvísköttunarsamningur við það land sem viðkomandi býr í gildir eftirfarandi:

Greiddur er 20% tekjuskattur af tekjum, auk útsvars til þess sveitarfélags sem viðkomandi var síðast skráður í. Ef viðkomandi hefur aldrei búið á Íslandi fer útsvar eftir því hvar launagreiðandi er skráður.
Viðkomandi á ekki rétt á persónuafslætti.
Þurfi að sanna skattgreiðslurnar erlendis er hægt er að sækja um tekjuvottorð til Skattsins á eyðublaði RSK 14.10.

Þegar einstaklingur kemur hingað í stutta dvöl (minna en hálft ár) vegna vinnu fyrir íslenska aðila greiðir hann skatt hér á landi af þeim tekjum sem aflað er hér (takmörkuð skattskylda).

Dvölin má ekki fara yfir 183 daga á 12 mánaða tímabili, eftir það er komin á ótakmörkuð skattskylda hér á landi.

Réttur til persónuafsláttur miðast við dvalartíma á Íslandi. Lesa meira um persónuafslátt vegna flutnings til Íslands eða tímabundinnar dvalar.

Umsóknir um undanþágur frá skatti á Íslandi og endurgreiðslur

Þegar tvísköttunarsamningar eru í gildi milli Íslands og landsins sem einstaklingur er búsettur í getur verið hægt að sækja um lækkun eða undanþágu frá skatti á Íslandi. Um er að ræða eftirfarandi umsóknir fyrir ólíkar tegundir greiðslna.

Launatekjur og lífeyrisgreiðslur

Undanþága frá skattlagningu launatekna eða lífeyristekna samkvæmt tvísköttunarsamningi (5.49) – leiðbeiningar og umsókn

Athugið að gera þarf grein fyrir launatekjum og lífeyrisgreiðslum í skattframtali á Íslandi.

Aðrar tegundir af greiðslum og tekjum

Dæmi um greiðslur sem falla hér undir eru verktakagreiðslur eða tilteknar fjármagnstekjur.

Undanþága eða lækkun á skattgreiðslum á grundvelli tvísköttunarsamnings (5.42) – leiðbeiningar og umsókn.

Endurgreiðsla af ofgreiddum skatti á grundvelli tvísköttunarsamnings (5.43) – leiðbeiningar og umsókn.

Það er mikilvægt að skoða hvern tvísköttunarsamning fyrir sig og skoða hvað gildir um mismunandi tegundir af tekjum.

Skattframtal

Athugið að ef um er að ræða launatekjur eða lífeyrisgreiðslur þarf áfram að skila skattframtali á Íslandi á hverju ári. Ef skattur hefur þegar verið greiddur á Íslandi en þú áttir rétt á undanþágu, færð þú ofgreiddan skatt endurgreiddan við álagningu næsta árs.

Staðfesting á greiðslum hérlendis

Ef þú þarft að sanna skattgreiðslur þínar á Íslandi gagnvart skattyfirvöldum í landinu sem þú býrð í getur þú sótt um tekjuvottorð hjá Skattinum á eyðublaði RSK 14.10.

Þjónustuaðili

Skatturinn