Prentað þann 1. sept. 2024
91/1998
Reglugerð um breytingu á reglugerð nr. 189/1990 um innflutning og útflutning á plöntum og plöntuafurðum.
1. gr.
Við upptalningu á skaðvöldum í viðauka I með reglugerðinni bætist eftirfarandi:
Skordýr, mítlar og þráðormar. | Helstu hýsilplöntur. |
Duponchelia fovealis. | Ýmsar tegundir. |
2. gr.
Viðauki IV með reglugerðinni orðast svo:
Viðauki IV:
Plöntur sem einungis má flytja til landsins svo fremi sem tilgreind skilyrði séu uppfyllt:
1. Plöntur til áframhaldandi ræktunar eða fjölgunar.
a) Á síðasta vaxtarskeiði plantnanna í ræktunarlandinu skulu þær hafa lotið opinberu heilbrigðiseftirliti í minnst einn mánuð fyrir sendingu til Íslands. Þá mega skaðvaldar skv. viðauka I ekki hafa fundist.
b) Vörtupest (Synchytrium endobioticum) má aldrei hafa fundist á vaxtarstaðnum.
c) Kartöfluhnúðormur (Globodera pallida og G. rostochiensis) má ekki vera á vaxtarstaðnum og má aldrei hafa fundist þar. Jarðvegsrannsókn vegna hnúðorms skal vera gerð samkvæmt viðurkenndum aðferðum og má ekki hafa sýnt hnúða í jarðvegi.
d) Kartöflubjalla (Leptinotarsa decemlineata) má ekki koma fyrir á vaxtarstaðnum.
e) Þegar um útsæðiskartöflur er að ræða má kartöflumygla (Phytophthora infestans) ekki hafa sést á kartöflugrösum á vaxtarstaðnum á því vaxtarskeiði þegar hnýðin mynduðust og einkenni kartöflumyglu mega ekki sjást á hnýðunum.
2. Kartöflur.
Kartöflur sem fluttar eru inn skulu uppfylla þær kröfur sem felast í lið 1, a-d, í viðauka IV.
3. gr.
Reglugerð þessi er sett samkvæmt heimild í lögum nr. 51/1981 um varnir gegn sjúkdómum og meindýrum á plöntum og öðlast þegar gildi.
Landbúnaðarráðuneytinu, 2. febrúar 1998.
Guðmundur Bjarnason.
Jón Höskuldsson.
Fyrirvari
Reglugerðir eru birtar í B-deild Stjórnartíðinda skv. 3. gr. laga um Stjórnartíðindi og Lögbirtingablað, nr. 15/2005, sbr. reglugerð um útgáfu Stjórnartíðinda nr. 958/2005.
Sé misræmi milli þess texta sem birtist hér í safninu og þess sem birtur er í útgáfu B-deildar Stjórnartíðinda skal sá síðarnefndi ráða.