Ef barn er á ljósfjólubláa svæðinu þarf það ekki á sérstakri íhlutun að halda. Málþroski barnsins fylgir málþroska jafnaldra. Foreldrar eru hvattir til að halda áfram góðum málörvandi samskiptum og lestri í daglegu lífi.

Í samtali við foreldra er mikilvægt að leggja áherslu á málörvun heima, bæði í daglegum samskiptum og með daglegum lestri. Á heimasíðunni www.talmal.hi.is er að finna hugmyndir um hvernig styrkja má samskipti, til dæmis með því að vera góð málfyrirmynd, setja orð á athafnir og fylgja frumkvæði barnsins. Magn (það að tala mikið við barnið) skiptir miklu máli, svo og að endurtaka aftur og aftur orðin sem er verið að vinna með. Leikskólakennarar geta sett saman orðalista (í samráði við foreldra) sem unnið verður með heima og í leikskólanum. Daglegur lestur fyrir barnið styrkir orðaforða, málskilning og hljóðkerfisvitund auk þess að efla tengsl foreldra og barns.

Leikskólinn gerir áætlun til 6–8 vikna í samvinnu við foreldra þar sem barnið fær annað hvort sérstaka málörvun í hópi eða einstaklingsmiðaða áætlun. Íhlutunin þarf að vera vel skipulögð, markviss og tíð (10–20 mínútur, 4–5 sinnum í viku). Á miðju tímabili (eftir 3–4 vikur) þurfa þau sem sinna íhlutuninni að hittast og meta hvort barnið er að ná árangri. Ef framfarir eru merkjanlegar (t.d. notar ný orð, sýnir bókum meiri áhuga, tengist jafnöldrum betur) má halda áfram á sömu braut. Ef framfarir eru litlar eða engar þarf að endurskoða íhlutunina, þar sem verkefnin hafa hugsanlega verið of létt eða of þung. Allt starfsfólk deildarinnar þarf að koma að málörvun barnsins en gott er að einn ákveðinn starfsmaður sé ábyrgðaraðili. Mikilvægt er að fleiri en einn komi að íhlutuninni svo að hún falli ekki niður við fjarvistir. Hvetja þarf allt starfsfólk til að nota gæðamálörvunaraðferðir í daglegu starfi. Það eru aðferðir eins og að vera góð málfyrirmynd, setja orð á athafnir og hluti, endurtaka leiðrétt (e. recasting), endurtaka og lengja setningar barnsins og gefa barninu tíma til að tjá sig, sjá www.talmal.hi.is Mikilvægt er að starfsfólk tileinki sér þessar aðferðir í daglegum samskiptum og bendi foreldrum á þessar leiðir. Miklu máli skiptir að huga að góðum samskiptum við barnið, tala oft við það og endurtaka aftur og aftur orð og hugtök sem verið er að vinna með.

Stam er truflun á talflæði sem getur lýst sér með festingum, lengingum eða endurtekningum á hljóðum og orðum (t.d. „kkkkk-aka“, „mig…mig…mig“). Langflest börn sem byrja að stama á leikskólaaldri hætta eftir nokkurn tíma. Hjá nokkrum börnum verður stamið þrálátt. Líkur á því aukast eftir því sem stam barnsins hefur varað lengur og einnig ef það er algengt í ætt barnsins. Ef barn á aldrinum 3–6 ára hefur stamað í sex mánuði eða lengur, eða ef stamið er alvarlegt, skal vísa því til talmeinafræðings. Einnig ef foreldrar hafa áhyggjur af stami barnsins.