Samningur um Landgræðsluskóga endurnýjaður til ársins 2029

Frá þessu er sagt í frétt á vef matvælaráðuneytisins. Landgræðsluskógar eru samstarfsverkefni ríkisins og skógræktarfélaganna. Markmið þess er að græða lítt og ógróið land með fjölbreyttum skógum og stuðla þannig að ræktun skóga til útivistar fyrir almenning, bættum kolefnisbúskap lands, endurheimt vistkerfa og eflingu líffræðilegrar fjölbreytni. Verkefnið hófst árið 1990 og var hleypt af stokkunum í tilefni 60 ára afmælis Skógræktarfélags Íslands.

Í verkefninu hefur verið unnið að ræktun Landgræðsluskóga á um 150 svæðum um allt land og hafa alls verið gróðursettar frá upphafi liðlega 24,2 milljónir plantna á um 770 km² svæði. Land og skógur hefur eftirlit með framkvæmd samningsins.

Langflest ræktunarsvæði Landgræðsluskóga eru á landi í eigu sveitarfélaga, ríkis eða skógræktarfélaganna sjálfra. Skógræktarfélögin sjá um framkvæmd verkefnisins á hverjum stað, að útvega land, friðun og vörslu, gróðursetningu og umhirðu.

Samstarf ríkisins við skógræktarfélögin er byggt á því að unnið sé að þeirri stefnu sem stjórnvöld hafa sett. Samningurinn styður við ýmis markmið Lands og lífs, stefnu stjórnvalda í landgræðslu og skógrækt.

• Fréttin á vef ráðuneytisins