Nýtt fagráð um líknarþjónustu á Norðurlandi

Skipun fagráðsins er liður í innleiðingu fimm ára aðgerðaáætlunar heilbrigðisráðuneytisins frá 2021 þar sem lögð er áhersla á að líknarmiðstöðvar styðji við þróun og miðlun þekkingar í líknarmeðferð, bæði í heimahjúkrun og á hjúkrunarheimilum, og að byggt verði upp öflugt tengiliðanet milli heilbrigðisstofnana. Líknarmiðstöð var formlega stofnuð á Sjúkrahúsinu á Akureyri í ársbyrjun 2023 og hefur það hlutverk að efla samvinnu fagstétta í sérhæfðri líknarmeðferð, styrkja teymisvinnu og þróa þjónustuna í samræmi við þarfir sjúklinga og aðstandenda.

„Með skipun fagráðsins er stigið mikilvægt skref í að efla samræmda og heildstæða líknarþjónustu á Norðurlandi, þar sem áhersla er lögð á samstarf, þekkingarmiðlun og bætta þjónustu við sjúklinga og aðstandendur.“ Segir Dóra Björk Jóhannsdóttir, verkefnastjóri Líknarmiðstöðvar SAk og formaður fagráðsins.  

Hlutverk fagráðsins

Fagráðið mun vinna að því að:

• samhæfa og efla líknarmeðferð á Norðurlandi með auknu samstarfi heilbrigðisstofnana

• stuðla að þróun líknarmeðferðar og nýtingu gagnreyndrar þekkingar

• efla almenna líknarþjónustu við fjölbreytta sjúklingahópa og bæta aðgengi að sérhæfðri líknarþjónustu

• styrkja ráðgjafaþjónustu í sérhæfðri líknarmeðferð, meðal annars með eflingu líknarráðgjafateymis SAk

• auka fræðslu og þekkingu heilbrigðisstarfsfólks á líknarmeðferð

• efla þekkingu almennings á líknarþjónustu

• styrkja samstarf við háskólasamfélagið

 
Skipan fagráðsins Í fagráðið hafa eftirfarandi fulltrúar verið skipaðir til þriggja ára:

• Dóra Björk Jóhannsdóttir, verkefnastjóri Líknarmiðstöðvar SAk og formaður fagráðs

• Valgerður Þorsteinsdóttir, yfirlæknir öldrunarlækninga SAk

• Sólveig Pétursdóttir, yfirlæknir endurhæfingarlækninga SAk

• Arna Rún Óskarsdóttir, öldrunarlæknir HSN

• Hilda Hólm, gæðastjóri HSN

• Bryndís Björg Þórhallsdóttir, forstöðumaður hjúkrunar hjá Heilsuvernd

• Silja Jóhannsdóttir, hjúkrunarfræðingur hjá Heilsuvernd