Innbrot í veitingahús

Á síðasta sólarhring var brotist inn í tvö veitingahús í miðborginni en talið er að þjófarnir hafi haft lítið upp úr krafsinu. Litlum fjármunum var stolið á öðrum staðnum en á hinum var tekið eitthvað af áfengi. Þá var brotist inn í íbúð í einu úthverfa borgarinnar. Þar virðist engu hafa verið stolið en skemmdir voru unnar á húsmunum.

Í gær var sömuleiðis tilkynnt um þjófnað í kvikmyndahúsi. Þar var farið innfyrir afgreiðsluborð og peningar teknir ófrjálsri hendi. Í kjölfarið handtók lögreglan konu sem grunuð er um athæfið.