Innbrot í Reykjabúið í Mosfellsbæ

Lögreglan á höfuðborgarsvæðinu leitar vitna í tengslum við rannsókn hennar á innbroti í Reykjabúið á Suður-Reykjum í Mosfellsbæ aðfaranótt mánudagsins 1. júní, en þar var brotist inn í hænsnabú á fjórða tímanum umrædda nótt. Innbrotsþjófurinn, sem var svartklæddur, kom gangandi að Reykjabúinu frá Bjargsvegi, en ekki er ósennilegt að hann hafi verið akandi og lagt ökutæki sínu fjarri vettvangnum. Og komið þaðan fótgangandi, mögulega neðan úr Skammdal, frá Helgafellshverfinu, úr Reykjahverfinu eða frá Hafravatnsvegi. Mörg ökutæki eru búin myndavélum og því viðbúið að myndefni frá áðurnefndum tíma sé að finna í fórum einhverra. Einnig er biðlað til forsvarsmanna öryggismyndavéla sem kunna að vera á umræddu svæði að athuga með myndefni vegna málsins.