Húsleit í Mosfellsbæ

Lögreglan á höfuðborgarsvæðinu lagði hald á annan tug kílóa af kannabisefnum við húsleit í Mosfellsbæ í gær, en hluta efnanna var búið að pakka í sölueiningar. Þá tók lögregla líka í sína vörslu töluvert af peningum sem grunur leikur á að séu tilkomnir vegna fíkniefnasölu. Þrír karlar á fertugsaldri voru handteknir í þágu rannsóknarinnar, en málið telst nú upplýst.

Fyrrnefnd aðgerð er liður í að hamla gegn sölu og dreifingu fíkniefna en sem fyrr minnir lögreglan á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.