Fyrsta jafnlaunastaðfestingin

Embætti umboðsmanns skuldara hlaut þann 10. febrúar fyrst fyrirtækja og stofnana jafnlaunastaðfestingu hjá Jafnréttisstofu.

Til þess að hljóta jafnlaunastaðfestingu þurfa fyrirtæki og stofnanir að standa skil á ýmsum gögnum, til að mynda starfaflokkun, launagreiningu og útreikningi á kynbundnum launamun, viðbótargreiðslum og aukagreiðslum til kvenna og karla. Hjá Umboðsmanni skuldara starfa 17 konur og því ekki mögulegt að standa skil á útreikningi á kynbundnum launamun. Jafnlaunastaðfesting er engu að síður staðfesting Jafnréttisstofu á því að launakerfið og framkvæmd þess mismuni ekki í launum og kjörum óháð því hvernig kynjaskiptingin er á vinnustaðnum á hverjum tíma og því um mikilvægan áfanga að ræða.

Fyrirtæki og stofnanir þar sem starfa að jafnaði 25 – 49 starfsmenn hafa val um það að öðlast jafnlaunavottun eða jafnlaunastaðfestingu eigi síðar en 31. desember 2022. Jafnréttisstofa vinnur nú að því að útbúa leiðbeiningar til þeirra aðila sem velja staðfestingarleiðina.