Fundur evrópskra þjóðskjalavarða í Dyflinni

Fyrri fundardagurinn hófst með kynningu á verkefni Þjóðskjalasafns Írlands við stafræna miðlun manntalsins frá árinu 1926. Að því loknu voru ræddar hugmyndir um stofnun nýs undirhóps EAG um nýja og framvaxandi tækni. Drög að umboði hópsins höfðu verið send þátttakendum fyrir fundinn og urðu tilefni ítarlegrar umræðu.

Næsta dagskrármál tengdist framtíðarsýn Evrópusambandsins um gagnadrifið hagkerfi og nýjum leiðbeiningum Evrópska persónuverndarráðsins (EDPB) um vinnslu persónuupplýsinga í vísindarannsóknum. Fulltrúar framkvæmdastjórnar Evrópusambandsins og Þjóðskjalasafns Lettlands fluttu erindi um efnið.

Síðasta málefni dagsins snerist um skjöl tengd neyðar- og krísustjórnun og innleiðingu CER- og NIS2-tilskipananna. Drög að hvítbók, sem þjóðskjalasöfn Svíþjóðar, Finnlands og Danmerkur höfðu undirbúið, voru rædd á fundinum. Meðal þeirra hugmynda sem skoðaðar voru voru könnun á stöðunni í aðildarríkjunum, sameiginlegur viðmiðunarrammi, afhending gagna til varðveislu og gerð sameiginlegra leiðbeininga.

Seinni fundardagurinn hófst með kynningu á niðurstöðum könnunar meðal evrópskra þjóðskjalasafna á ýmsum sviðum starfseminnar. Niðurstöðurnar veittu gagnlegt yfirlit líkindi og ólíkar áherslur í starfsemi þjóðskjalasafnanna.

Í framhaldinu fór fram umræða um möguleg umfjöllunarefni á komandi fundum EBNA. Fjölmargar tillögur komu fram og munu þær nýtast við mótun vegvísis fyrir starf vettvangsins á næstu árum.

Að lokum kynnti þýska sambandsþjóðskjalasafnið, Bundesarchiv, þær áskoranir sem felast í því að tryggja uppruna og áreiðanleika skjala sem verða til á stafrænu formi.