Fimm styrkir veittir úr nýstofnuðum Vinnuverndarsjóði

Vinnuverndarsjóður, sem var settur á fót á síðastliðnu ári, er samstarfsverkefni félags- og vinnumarkaðsráðuneytisins og Vinnueftirlitsins. Markmið hans er að efla rannsóknir á sviði vinnuverndar og stuðla að bættri vinnuvernd á íslenskum vinnumarkaði. Sjóðnum er ætlað að styrkja rannsóknir og verkefni sem miða að því.

Félags- og vinnumarkaðsráðherra skipaði sjóðnum stjórn með fulltrúa stjórnvalda, fulltrúa samtaka launafólks og fulltrúa samtaka atvinnurekenda.Auglýst var eftir umsóknum um styrki í sjóðinn á vef Vinnueftirlitsins.

Frestur til að skila inn umsóknum var til 12. desember síðastliðinn. Alls bárust sextán umsóknir og hlutu fimm þeirra styrk.

Sjóðurinn hafði tíu milljónir króna til úthlutunar og var hámarksstyrkur á verkefni/rannsókn fjórar milljónir króna. Til stendur að auglýsa aftur eftir umsóknum um styrki í sjóðinn síðar á þessu ári og verður sama styrkupphæð til úthlutunar.

Eftirtalin hlutu styrki:

Frá vinnuklefa til sófans: Áhrif vinnuaðstæðna á líðan starfsfólks

Umsækjendur: Dr. Thamar Heijstra og dr. Guðbjörg Linda Rafnsdóttir, prófessorar í félagsfræði við Háskóla Íslands.
Styrkupphæð: 3.000.000 kr

Stutt lýsing: Spurningalisti verður lagður fyrir starfsfólk sem vinnur í fjarvinnu og niðurstöður hans bornar saman við samanburðarhóp sem ekki vinnur í fjarvinnu

Áhrif sjálfvirknivæðingar og fjarvinnu á starfstengda kulnun, starfstengd viðhorf, upplifun og hegðun í formi áforma um starfslok, auk tengsla við fjarvistir og starfsmannaveltu

Umsækjendur: Arney Einarsdóttir, prófessor við Háskólann á Bifröst og doktor í mannauðsstjórnun, og Katrín Ólafsdóttir, dósent í Háskólanum í Reykjavík og doktor í vinnumarkaðshagfræði.
Styrkupphæð: 2.990.000 kr.

Stutt lýsing: Markmiðið er að rannsaka tengsl bæði sjálfvirknivæðingar og fjarvinnu við kulnun og önnur lykilviðhorf og upplifun starfsfólks á vinnustöðum, eins og starfsánægju, upplifun á sanngirni, trausti og jafnrétti.

Áhrif starfsumhverfis hjúkrunarfræðinga á kulnun í starfi

Umsækjandi og verkefnisstjóri: Ásdís Aðalbjörg Arnalds, doktor í félagsráðgjöf og forstöðumaður Félagsvísindastofnunar Háskóla Íslands.
Styrkupphæð: 2.000.000 kr.

Stutt lýsing: Eigindleg rannsókn á orsökum kulnunar meðal hjúkrunarfræðinga á Landspítala. Markmiðið er að öðlast skilning á því hvernig kerfisbundnir þættir í starfi hjúkrunarfræðinga geta gert þá útsetta fyrir kulnun. Rannsóknarniðurstöður verða nýttar til að móta tillögur að úrbótum á starfsumhverfi hjúkrunarfræðinga í samráði við starfsfólk Landspítala.

Heilsueflandi vinnuumhverfi og góð vinnustaðamenning í skólum

Umsækjendur: Dr. Sigrún Gunnarsdóttir, prófessor við Viðskiptafræðideild Háskóla Íslands og Dr. Anna Magnea Hreinsdóttir, aðjunkt við Deild kennslu- og menntunarfræða í Háskóla Íslands
Styrkupphæð: 1.000.000 kr.

Stutt lýsing: Rannsókn sem miðar að því að auka þekkingu á heilsueflandi vinnuumhverfi og góðri vinnustaðamenningu í grunn- og leikskólum, sem getur haft góð áhrif á vellíðan kennara og dregið úr fjarveru þeirra og brottfalli úr starfi. Rannsóknin byggir á viðtölum við stjórnendur og kennara í skóla þar sem vel gengur.

Vinnuvernd og vinnuréttur – fræðsla fyrir nemendur með erlendan tungumála- og menningarbakgrunn

Umsækjandi: Tækniskólinn, skóli atvinnulífsins. Verkefnisstjóri er Þröstur Þór Ólafsson, öryggisstjóri Tækniskólans.
Styrkupphæð: 1.000.000 kr.

Stutt lýsing: Gerð fræðsluefnis um vinnuverndarmál á íslenskum vinnumarkaði fyrir nemendur með erlendan tungumála- og menningarbakgrunn.

Vinnueftirlitð óskar styrkþegum innilega til hamingju og vonar að niðurstöður þeirra komi til með að auka þekkingu á sviði vinnuverndar svo stuðla megi enn frekar að bættri vellíðan og öryggi starfsfólks á innlendum vinnustöðum.