Bruggverksmiðja upprætt

Um miðjan mánuðinn barst Lögreglunni á höfuðborgarsvæðinu ábending um sölu og framleiðslu á ólöglegu áfengi, eða „landa“. Í kjölfarið var gerð húsleit í miðborginni en við leitina fundust 499 lítrar af gambra og tæplega 38 lítrar af landa. Skemmst er frá því að segja að húsráðandi var ekki með leyfi til áfengisframleiðslu enda var ýmislegt aðfinnsluvert við framleiðsluna, meðal annars hreinlæti. Við húsleitina fundust einnig 44 kg.af sykri.

Húsráðandi gekkst við því að hafa staðið að áfengisframleiðslunni en einnig kom fram að sykurinn sem fannst við leitina hafi einnig átt að notast til baksturs. Málið telst upplýst.