Birki gróðursett í lúpínu í tilefni sjálfbærniviku

Gróðursetningin var liður í sjálfbærniviku fyrirtækisins þar sem starfsfólkið fræðist um umhverfismál og leggur sitt af mörkum í þágu náttúru og umhverfis. Meðal annars fengu þau fræðslu um bokashi-jarðgerð en stóðu líka fyrir strandhreinsun og plokki.

Fyrirtækið hefur tekið að sér rofið svæði sem það mun á næstu árum græða upp og að lokum endurheimta birkivistkerfi. Tveir fulltrúar Lands og skógar, þau Helga Lucie Andrée Káradóttir héraðsfulltrúi og Magnús Þór Einarsson, verkefnastjóri endurheimtar skóga, aðstoðuðu við gróðursetninguna sem fór fram í blíðuveðri miðvikudaginn 24. apríl.

Svæðið sem gróðursett var í er á Geitasandi á Rangárvöllum. Lúpína er í jaðri svæðisins en þar hefur að öðru leyti ekki verið unnið að uppgræðslu hingað til. Birkið er gróðursett í lúpínuna og í framhaldinu verður unnið að því að búa svæðið allt undir gróðursetningu birkis. Fyrirtækið Midgard fær til sín erlenda hópa háskólanema vor og haust sem hingað koma til að læra um endurnýjanlegar orkuauðlindir og sjálfbærni. Þessir hópar munu leggja sitt til endurheimtarverkefnisins á Geitasandi líka.

Heimild: Helga Lucie Andrée Káradóttir
Ljósmyndir: Midgard