7. maí 2019
7. maí 2019
Brjóstapúðar áfram til skoðunar
Embætti landlæknis og Lyfjastofnun fylgjast með alþjóðlegri umfjöllun um brjóstapúða af ákveðinni gerð, vegna tengsla þeirra við sjaldgæft eitilfrumukrabbamein.
![](https://images.ctfassets.net/8k0h54kbe6bj/30gJRJab1dCduDFlnUZvTC/d785bca9c41af1c63b96240d7bf4ce92/Lit_ISL_ENG_Stort.jpg?w=50&fm=webp&q=80)
![Landlæknir logo - Fréttamyndir](https://images.ctfassets.net/8k0h54kbe6bj/30gJRJab1dCduDFlnUZvTC/d785bca9c41af1c63b96240d7bf4ce92/Lit_ISL_ENG_Stort.jpg?w=774&fm=webp&q=80)
Embætti landlæknis og Lyfjastofnun fylgjast með alþjóðlegri umfjöllun um brjóstapúða af ákveðinni gerð, vegna tengsla þeirra við sjaldgæft eitilfrumukrabbamein (BIA-ALCL; breast implant-associated anaplastic large cell lymphoma). Púðarnir sem sjónir hafa einkum beinst að eru með hrjúfu yfirborði og framleiddir af lyfjafyrirtækinu Allergan. Hætt var að selja þessa púða í Evrópu í lok síðasta árs, líkt og fram kom í tilkynningu frá Lyfjastofnun í desember síðastliðnum.
Umræddir púðar voru notaðir hér á landi á árunum 2007 – 2015 en innflutningi þeirra var hætt um mitt ár 2015. Talið er að á þessu árabili hafi um 470 konur hérlendis fengið þessa tegund brjóstapúða ígrædda. Eitilfrumukrabbamein tengt brjóstapúðum er afar sjaldgæft og engin dæmi þess hérlendis.
Ekki er talin þörf á að grípa til sérstakra aðgerða vegna þeirra kvenna sem eru með þessa brjóstapúða. Um þetta eru alþjóðlegar stofnanir og sérfræðingar sammála í ljósi þess að meinið er sjaldgæft og einkenni þess afgerandi.
Franska lyfjastofnunin tilkynnti 4. apríl síðastliðinn að í Frakklandi megi ekki lengur nota tilteknar tegundir brjóstapúða með hrjúfu yfirborði af grófustu gerð. Aðrar þjóðir hafa ekki talið ástæðu til slíks banns, hvorki í Evrópu né annars staðar á Vesturlöndum. Púðarnir frá Allergan eru enn á markaði í löndum utan Evrópu, meðal annars í Bandaríkjunum, Ástralíu og Kanada. Íslensk heilbrigðisyfirvöld munu áfram fylgjast vel með faglegri umfjöllun heilbrigðisyfirvalda og eftirlitsaðila í Evrópu og víðar um þessi mál.
Vegna þessa máls hafa Embætti landlæknis og Lyfjastofnun tekið saman spurningar og svör með upplýsingum og fræðslu um eitilfrumukrabbamein tengt brjóstapúðum (BIA-ALCL).
Spurt og svarað
Ítarefni:
Lyfjastofnun: Allergan stöðvar sölu og innkallar óselda brjóstapúða
Lyfjastofnun: Franska lyfjastofnunin hvetur til varkárni við val á brjóstapúðum til ígræðslu
Nánari upplýsingar veita:
Alma D. Möller landlæknir, sími 5101900, netfang: mottaka@landlaeknir.is
Rúna Hauksdóttir Hvannberg forstjóri Lyfjastofnunar, sími 5202100, netfang: upplysingadeild@lyfjastofnun.is