4.500 til 6.500 umsóknir um vernd 2023

Útlendingastofnun telur að umsóknir um vernd verði ekki færri á þessu ári en því síðasta. Fjöldi umsókna þá var 4.518 og hefur aldrei verið meiri, sjá frétt um tölfræði ársins 2022. Áætlanir stofnunarinnar byggja á þeim forsendum að í nánustu framtíð sé hvorki að vænta breytinga á ástandinu í Úkraínu né í komum umsækjenda um vernd frá Venesúela.

Í spálíkani stofnunarinnar er gert ráð fyrir þremur sviðsmyndum sem byggja á meðalfjölda umsókna um vernd síðustu sex (lágspá), fjóra (miðspá) og tvo (háspá) mánuði ársins 2022.

Fjöldi umsókna um vernd í janúar 2023 var 450 sem fellur mitt á milli forsendna lág- og miðspár.

Fjölmargir óvissuþættir geta haft áhrif til fjölgunar og því er ekki hægt að útiloka að umsóknir á árinu verði jafnvel umtalsvert fleiri en 6.500. Spáin verður uppfærð á öðrum ársfjórðungi.