Umfangsmiklar breytingar á lögum um sjúkratryggingar

Markmið breytinganna er meðal annars að styrkja hlutverk Sjúkratrygginga sem kostnaðargreinanda og kaupanda heilbrigðisþjónustu, efla gagnadrifna ákvarðanatöku, bæta eftirlit og stuðla að skilvirkari nýtingu fjármuna í heilbrigðiskerfinu.

Meðal helstu breytinga eru:

• Biðtími eftir sjúkratryggingu styttist. Þetta þýðir að þeir sem flytja frá löndum utan EES þurfa að bíða í þrjá mánuði eftir sjúkratryggingu, eftir að þeir flytja lögheimili sitt til landsins. Biðtíminn var áður sex mánuðir.

• Þeir sem ferðast til landa utan EES eftir 1. ágúst nk. verða ekki tryggðir gagnvart kostnaði sem þeir kunna að verða fyrir vegna veikinda eða slysa. Ferðamönnum er bent á að kanna tryggingarétt sinn hjá tryggingafélögum og athuga kortatryggingar sínar.

• Áréttað er í lögunum að ákvarðanir Sjúkratrygginga skuli byggja á gagnreyndri þekkingu og faglegu og hagrænu mati.

• Sjúkratryggingar fá auknar heimildir til gagnaöflunar og eftirlits til að tryggja rétta framkvæmd og greiðslur.

• Ný ákvæði styrkja heimildir stofnunarinnar til kostnaðargreiningar, eftirlits með samningum og þjónustutengdri fjármögnun.

• Heimildir til að nýta sérstök fjármögnunarlíkön við greiðslur fyrir heilbrigðisþjónustu verða skýrari.

• Kveðið er á um aukna samræmingu upplýsinga, skráningu biðlista og miðlun gagna í þágu betri þjónustu og eftirlits.

• Aukin áhersla á stafræna þjónustu, rafræn samskipti og örugga meðferð persónuupplýsinga.

• Stjórn Sjúkratrygginga verður lögð niður.

Lögin má finna hér: 1257/157 lög í heild: sjúkratryggingar og ófrjósemisaðgerðir | Þingtíðindi | Alþingi