Faglegt og skipulagt ráðningarferli miðar að því að hæfasti umsækjandinn verði ráðinn hverju sinni. Þannig er jafnframt tryggt að ákvörðun um ráðningu grundvallist á hlutlægu mati.

Áður en ákvörðun um ráðningu er tekin þarf að liggja fyrir

• niðurstaða úr starfsgreiningu

• starfslýsing þar sem fram kemur í hverju starfið felist og hvaða hæfnisskilyrði starfsfólk þarf að uppfylla til að sinna umræddu starfi

Verkáætlun

Þegar ákvörðun um að ráða eigi í tiltekið starf liggur fyrir er æskilegt að gera verkáætlun þar sem hlutverk allra er að málinu koma er skilgreint. 

Einnig þarf að ákveða hvort:

• stofnunin sjái sjálf um ráðninguna

• skipa þurfi hæfnisnefnd

• ráðningarstofa verði fengin til að sjá um hluta af ráðningarferlinu. 

Hæfnisnefndir

Samkvæmt 39. grein b. í starfsmannalögum getur hlutaðeigandi ráðherra eða stjórn falið sérstakri hæfnisnefnd þriggja manna að meta hæfni umsækjenda um starf forstöðumanns og er niðurstaða hennar ráðgefandi. Fjármála- og efnahagsráðherra setur reglur um hæfnisnefndir þar sem meðal annars er fjallað um skipun nefndar og hæfi
nefndarmanna svo og verkefni og málsmeðferð.