Í auglýsingu um laust starf skal tilgreina starfsheiti, heiti stofnunar og staðsetningu starfs eða hvort það sé án staðsetningar. Ef um tímabundið starf er að ræða verður það jafnframt að koma fram í auglýsingu.

Í auglýsingu skal að lágmarki ávallt tilgreina eftirfarandi:

• Hvaða starf og starfssvið er um að ræða. Lýsing starfs skal vera nægjanlega
  greinargóð til þess að mögulegir umsækjendur geti gert sér glögga grein fyrir
  því í hverju starfið felst.

• Starfshlutfall.

• Stjórnunarlega stöðu starfsins innan stofnunar/ríkisfyrirtækis.

• Menntunar- og hæfniskröfur.

• Aðrar almennar og sértækar kröfur sem gerðar eru til starfsmanns.

• Starfskjör (eftir hvaða kjarasamningi þau fara).

• Hvenær æskilegt er að starfsmaður hefji störf.

• Hvar leita skuli frekari upplýsinga.

• Lengd umsóknarfrests.

• Hvert umsókn á að berast og á hvaða formi.

Sjá nánar reglur um auglýsingu lausra starfa fyrir almenna starfsmenn. 

Hvergi er mælt fyrir um það hvað skuli að lágmarki koma fram í auglýsingu um laust embætti. Þó gera starfsmannalögin ráð fyrir almennum skilyrðum fyrir setningu og ýmis sérlög geta gert kröfur um tiltekna menntun eða hæfni einstakra starfsstétta. Sem dæmi er oft gerð krafa um tiltekna menntun hjá lögreglumönnum. 

Séu engin fyrirmæli í lögum um lágmarkskröfur, er það sá sem veitir embætti sem ákveður hvort krefjast skuli ákveðinnar menntunar eða hæfni. Þá þarf að vera ljóst samhengi á milli starfsins og krafna sem gerðar eru til umsækjenda. 

Þegar eðli starfsins krefst tiltekinnar menntunar, hæfni eða reynslu ber að taka slíkt fram í auglýsingu. 

Einnig má hafa hliðsjón af 

• reglum um auglýsingar lausra starfa sem eiga við um almenn störf hjá ríkinu. Í 4. gr. reglnanna eru talin upp þau atriði sem að lágmarki þurfa að koma fram í auglýsingu. 

• 6. gr. starfsmannalaga þar sem fjallað er um almenn skilyrði þess að fá setningu eða ráðningu í starf hjá ríkinu. Í 5. tl. 1. málsgeinar. 6. gr. laganna er talað um að starfsmaður verði að hafa þá almennu menntun og að auki þá sérmenntun sem lögum samkvæmt er nauðsynleg til þess að sinna starfinu óaðfinnanlega.

Laust embætti verður stofnun að auglýsa undir nafni.  

Bannað er að gefa í skyn að frekar sé óskað eftir einu kyni frekar en öðru í 3. málsgrein 19. greinar jafnréttislaga. Þó er það heimilt ef markmiðið er að jafna kynjaskiptingu innan starfsgreinarinnar og þarf þá að taka það skýrt fram í auglýsingunni. Sama á við ef gild rök mæla með því að einungis sé auglýst eftir starfskrafti af tilteknu kyni.

Ekki er hægt að heita umsækjendum trúnaði. Fram kemur í lokamálsgrein 7. grein starfsmannalaga að skylt sé, sé þess óskað, að veita almenningi aðgang að upplýsingum um nöfn og starfsheiti umsækjenda þegar umsóknarfrestur er liðinn. Sambærilega reglu er einnig að finna í 2. málsgrein 7. greinar upplýsingalaga.