Samkvæmt reglum um auglýsingar lausra starfa er ekki skylt að auglýsa störf í eftirfarandi tilvikum:

• Störf sem aðeins eiga að standa í tvo mánuði eða skemur.

• Störf sem eru tímabundin vegna sérstakra aðstæðna, svo sem vegna orlofs, veikinda, fæðingar- og foreldraorlofs, námsleyfis eða leyfis til starfa á vegum alþjóðastofnana, enda sé ráðningu ekki ætlað að standa lengur en 12 mánuði samfellt.

• Störf sem auglýst hafa verið innan síðustu sex mánaða og í auglýsingunni hafi þess verið getið að hún gæti gilt í sex mánuði. Hér er átt við að ef tekið er fram í auglýsingu um starf að umsókn um starfið geti gilt í sex mánuði, þarf ekki að auglýsa aftur ef sams konar starf losnar. 

  • Dæmi: Tíu umsóknir berast um auglýst starf þar sem tekið er fram að umsókn geti gilt í sex mánuði. Stofnun ræður í starfið en geymir hinar níu umsóknirnar. Ef hið auglýsta starf losnar á ný á næstu sex mánuðum þarf stofnun ekki að auglýsa aftur heldur getur hún tekið fram umsóknirnar sem bárust vegna upphaflegu auglýsingarinnar og ráðið í starfið úr hópi umsækjenda.

• Störf vegna tímabundinna vinnumarkaðsúrræða á vegum stjórnvalda og aðila vinnumarkaðarins.

• Hlutastörf fyrir einstaklinga með skerta starfsgetu sem teljast til vinnumarkaðsúrræða.

Heimilt er án þess að auglýsa starf að ákveða að starfsmaður sem ráðinn er ótímabundið, sé fluttur tímabundið eða varanlega milli stjórnvalda, enda liggi fyrir samþykki viðkomandi forstöðumanns fyrir flutningnum og starfsmannsins sjálfs, sjá nánar 2. málsgrein 7. grein starfsmannalaga

Meginreglan er að ekki er skylt að auglýsa starf laust til umsóknar þegar starfi er breytt á grundvelli 19. greinar starfsmannalaga eða samkvæmt samkomulagi við starfsmann, en samkvæmt greininni er starfsmanni skylt að hlíta breytingum á störfum sínum og verksviði frá því er hann tók við starfi.