Lágmarksupplýsingar sem þurfa að koma fram í ráðningarsamningi eru taldar upp í reglum um form ráðningarsamninga og um skyldu til að upplýsa starfsmenn um ráðningarkjör. Þar kemur jafnframt fram að verði afmarkaðar breytingar á ráðningarkjörum umfram það sem leiðir af lögum, stjórnvaldsfyrirmælum eða kjarasamningum skuli stofnun staðfesta breytingarnar með skriflegum hætti.

Meginreglan er að starfsfólk ríkisins sé ráðið til starfa ótímabundið með gagnkvæmum uppsagnarfresti. Sjá 1. málsgrein 41. grein starfsmannalaga.

Tímabundin ráðning er heimil samkvæmt 2. mgr. 41. gr. starfsmannalaga en má ekki vara samfellt lengur en í tvö ár í sama starfi.

Uppsagnarfrestur tímabundinnar ráðningar er 1 mánuður, miðað við mánaðamót, enda hafi hann verið tilgreindur í ráðningarsamningi.

Reglur um auglýsingar á lausum störfum eiga við um tímabundnar ráðningar.

Almennir starfsmenn hjá ríkinu eru yfirleitt ráðnir með ákveðinn reynslutíma í upphafi starfs. Sjá 41. gr. starfsmannalaga. Ekki er tekið fram í lögunum hversu langur reynslutíminn skal vera. Forstöðumenn geta því ákveðið lengd reynslutímans hverju sinni með því að skrá hann í ráðningarsamning. Algengt er að reynslutími sé þrír til sex mánuðir. Öruggast er að taka fram með nákvæmum hætti í ráðningarsamningi ef lengd reynslutíma á að vera önnur en þrír mánuðir.

Reynslutíma ættu báðir aðilar að nýta sem best. Á reynslutíma er gott fyrir nýtt starfsfólk að máta sig við umrætt starf og fyrir stofnunina að kynnast nýja starfsfólkinu.

Á reynslutíma þurfa væntingar til starfsfólks að vera skýrar svo það viti til hvers er ætlast af þeim í starfinu. Mikilvægt er að starfsfólk á reynslutíma fái viðeigandi leiðsögn og tækifæri til að leiðrétta mistök eða bæta frammistöðu hafi komið upp einhver vandamál. 

Einnig er mikilvægt að muna eftir því að hrósa fyrir það sem vel er gert og efla þannig sjálfstraust og áhuga starfsfólks í starfi.

Þegar líður að lokum reynslutíma ætti yfirmaður að ræða við starfsmann og fara yfir reynsluna af störfum hans og hvernig honum hefur tekist að aðlagast nýju starfi og vinnustað. Ef vilji er til að hann haldi áfram störfum er mikilvægt að það komi skýrt fram af hálfu yfirmanns.

Ef til stendur að segja starfsmanni upp á reynslutíma þarf að gera það áður en reynslutíminn er liðinn. Við nýráðningar er æskilegt að tiltaka lengd reynslutímans í ráðningarsamningi. Sé það ekki gert telst reynslutími yfirleitt þrír mánuðir.

Gagnkvæmur uppsagnarfrestur á reynslutíma er yfirleitt einn mánuður, miðað við mánaðamót. Hægt er að framlengja reynslutíma og þarf að gera slíkt í samræmi við lengd uppsagnartíma á reynslutíma. 

Fram hefur komið í dómaframkvæmd að hægt er segja starfsmanni upp með eins mánaðar uppsagnarfresti, miðað við mánaðamót, þó svo langt sé liðið á þriðja mánuð reynslutímans. 

Rökstuðningur uppsagnar á reynslutíma

Á reynslutíma er jafnan hægt að segja ráðningarsamningi upp með tilskildum uppsagnarfresti. Óski starfsmaður eftir rökstuðningi er talið fullnægjandi að tilgreina að uppsögnin hafi átt sér stað á reynslutíma samningsins og að hún hafi verið í samræmi við umsaminn uppsagnarfrest.