Hagfræðingur á skrifstofu kjara- og mannauðsmála

Fjármála- og efnahagsráðuneytið leitar að metnaðarfullum og úrræðagóðum hagfræðingi til starfa í öflugum hópi fagfólks á skrifstofu kjara- og mannauðsmála (SKM).

Skrifstofan sinnir fjölbreyttum verkefnum á sviði kjara-, vinnumarkaðs- og mannauðsmála og veitir m.a. stefnumarkandi ráðgjöf á sviði kjara- og mannauðsmála fyrir stofnanir ríkisins. Hlutverk SKM er að stuðla að framþróun í starfsumhverfi ríkisins með það að markmiði að efla skilvirkni, árangur og gæði opinberrar þjónustu. Innan SKM starfar öflugur hópur sérfræðinga með víðtæka reynslu af vinnumarkaðs-, mannauðs- og kjaramálum. Fram undan eru fjölbreytt og krefjandi verkefni á sviði kjaramála, vinnumarkaðsgreininga og stefnumótunar ríkisins í mannauðsmálum sem fela í sér spennandi tækifæri.

• Þátttaka í stefnumótun og framþróun á sviði kjara-, vinnumarkaðs- og mannauðsmála.

• Þátttaka í gerð, innleiðingu og eftirfylgni kjarasamninga fyrir hönd ríkisins.

• Greining á launaþróun, kjaratölfræði og öðrum vinnumarkaðsgögnum sem styðja við faglega ákvarðanatöku.

• Undirbúningur gagna og greininga fyrir samningsgerð og stefnumótun.

• Samskipti við aðila innan stjórnsýslunnar, stéttarfélög og aðra hagsmunaaðila.

• Þátttaka í nefndum, starfshópum og þróunarverkefnum.

• Grunn- og meistarapróf á sviði hagfræði.

• Víðtæk þekking og reynsla af kjaratölfræði, launa- og vinnumarkaðsgreiningum.

• Færni í hagnýtingu gagna við stefnumótun og ákvarðanatöku.

• Þekking og reynsla af vinnumarkaðsmálum.

• Rík greiningarhæfni og reynsla af úrvinnslu og framsetningu upplýsinga á skýran og markvissan hátt.

• Mjög góð samskiptafærni ásamt góðri reynslu af farsælli teymisvinnu.

• Lausnamiðuð og gagnrýnin hugsun, frumkvæði og sjálfstæði í vinnubrögðum.

• Reynsla af vinnu við undirbúning, gerð og eftirfylgni kjarasamninga, túlkun þeirra og framkvæmd er kostur.

• Mjög góð íslenskukunnátta í ræðu og riti.

• Kunnátta í öðru norðurlandatungumáli er kostur.

Laun samkvæmt gildandi kjarasamningi sem fjármála- og efnahagsráðherra og Félag háskólamenntaðra starfsmanna Stjórnarráðsins hafa gert.

Í boði er áhugavert starf á krefjandi og skemmtilegum vinnustað. Á skrifstofu kjara- og mannauðssmála starfa 11 sérfræðingar en í ráðuneytinu öllu tæplega 100 starfsmenn. Ráðuneytið hefur frumkvæði, fagmennsku og árangur að leiðarljósi í starfsemi sinni. Upplýsingar um starfsemi ráðuneytisins er að finna á Stjórnarráðið | Fjármála- og efnahagsráðuneytið.

Umsóknir geta gilt í sex mánuði frá birtingu þessarar auglýsingar, sbr. reglur nr. 1000/2019 um auglýsingu lausra starfa. Til greina kemur að ráða fleiri en einn aðila á grundvelli þessarar auglýsingar.

Umsókn um starfið þarf að fylgja ítarleg ferilskrá og kynningarbréf þar sem gerð er grein fyrir ástæðu umsóknar og rökstuðningi fyrir hæfni umsækjanda í starfið. Umsækjendum kann að vera gert að leysa verkefni í ráðningarferlinu sem kæmi, auk annarra þátta, heildstætt inn í hæfnimatið.