Nýdoktor í greiningu LiDAR punktskýja af íslenskum torfbæjum

Laust er til umsóknar fullt starf nýdoktors, tímabundið til 12 mánaða, við Umhverfis- og byggingarverkfræðideild Háskóla Íslands. Starfið er hluti af rannsóknarverkefninu Mælingar og greining á raka- og hitaástandi ásamt vöktun burðarvirkis torfbæja: Varðveisla til framtíðar. Verkefnið er samstarfsverkefni Háskóla Íslands og Þjóðminjasafns Íslands og er styrkt af Rannsóknasjóði Rannís. Að því stendur þverfaglegur rannsóknarhópur sem býr yfir sérþekkingu á sviði burðarvirkja, byggingarfræði, ástandsvöktunar burðarvirkja, byggingarefna, íslensks byggingararfs og varðveislu.

Íslenskir torfbæir eru einstakur hluti íslensks byggingararfs. Torfþök þeirra hvíla á timburgrindum þar sem vart hefur orðið við hreyfingar og formbreytingar. Ekki er ljóst að hve miklu leyti þessar hreyfingar stafa af eðlilegum árstíðabundnum breytingum eða langtímaferlum, svo sem sigi eða hrörnun burðarvirkis. Með endurteknum þrívíddarmælingum gefst tækifæri til að mæla þessar breytingar og þróa aðferðir til langtímavöktunar á burðarvirkjum þessara flóknu sögulegu bygginga.

Þjóðminjasafn Íslands á og viðheldur einstöku safni sögulegra torfbæja víðs vegar um Ísland. Þrír bæir, Keldur, Laufás og Grenjaðarstaður, hafa verið valdir til ítarlegrar vöktunar í verkefninu. Rannsóknarverkefnið í heild sameinar vöktun umhverfisaðstæðna, rannsóknir á efniseiginleikum, tölulegar hermanir og vöktun burðarvirkja.

Starfsaðstaða nýdoktorsins verður við Umhverfis- og byggingarverkfræðideild Háskóla Íslands og mun hann vinna náið með rannsakendum við Háskóla Íslands og sérfræðingum Þjóðminjasafns Íslands.

Nýdoktorinn mun vinna sérstaklega að greiningu þrívíðra LiDAR-punktskýja af íslenskum torfbæjum. Markmiðið er að þróa og beita aðferðum til að greina, mæla og túlka breytingar á rúmfræði bygginganna og burðarvirkjum þeirra úr timbri yfir tíma.

• Ábyrgð á þeim hluta verkefnisins sem snýr að greiningu punktskýja.

• Úrvinnsla og greining þrívíðra LiDAR-punktskýja sem safnað hefur verið í torfbæjum á mismunandi tímum.

• Þróun áreiðanlegra aðferða til að bera saman endurteknar punktskýjamælingar og greina breytingar á rúmfræði og hreyfingar burðarvirkja.

• Mæling og greining á færslum, formbreytingum og sigi viðeigandi byggingarhluta, einkum timburgrinda sem bera torfþökin.

• Aðgreining raunverulegra breytinga á burðarvirki frá mælióvissu, skekkjum í samstillingu punktskýja, suði og öðrum breytileika í gögnum.

• Greining á breytingum yfir tíma, þar á meðal mögulegum árstíðabundnum hreyfingum og langtímabreytingum.

• Þróun endurtakanlegra reikniaðferða og verkferla fyrir úrvinnslu, greiningu og myndræna framsetningu punktskýja.

• Mat á og, eftir því sem við á, endurbætur á mæli- og gagnaúrvinnsluaðferðum sem notaðar eru við áframhaldandi vöktun.

• Túlkun niðurstaðna í samstarfi við rannsakendur á sviði burðarvirkja, byggingarverkfræði og varðveislu byggingararfs.

• Ritun vísindagreina og kynning niðurstaðna á alþjóðlegum ráðstefnum.

• Doktorsgráða í verkfræði, hagnýtri stærðfræði, hagnýtri eðlisfræði, tölvunarfræði, landmælingum, reiknivísindum eða öðru skyldu raunvísinda- eða tæknisviði sem nýtist við verkefnið. Umsækjandi skal hafa lokið prófi þegar starf hefst.

• Reynsla af tölulegri greiningu og/eða gagnagreiningu.

• Reynsla af forritun í forritunarmáli sem hentar til vísindalegrar gagnaúrvinnslu, svo sem Python, C++, MATLAB eða sambærilegu.

• Þekking á þróun greiningaraðferða og lausnum reiknilegra viðfangsefna er kostur.

• Góð færni í ritaðri og talaðri ensku.

• Góð samskiptahæfni, sjálfstæð vinnubrögð ásamt því að geta unnið í þverfaglegum rannsóknarhópi.

Reynsla á einu eða fleiri eftirfarandi sviðum er æskileg:

• Úrvinnsla og greining þrívíðra punktskýja.

• LiDAR-mælingar eða þrívíddarskönnun frá föstum eða færanlegum mælibúnaði.

• Samstilling punktskýja og greining breytinga.

• Tölvusjón eða úrvinnsla þrívíðrar rúmfræði.

• Ástandsvöktun burðarvirkja eða greining formbreytinga.

• Ljósmyndamælingar, landmælingar eða skyldar mæliaðferðir.

• Tölfræðileg greining á mælióvissu og áhrifum hennar.

• Reynsla af hugbúnaði eða forritasöfnum fyrir punktský, svo sem CloudCompare, Open3D, PCL, PDAL eða sambærilegum verkfærum.

Umsækjandi skal hafa lokið doktorsprófi innan sjö ára þegar ráðning hefst. Þó er heimilt að taka tillit til reglna styrkveitenda, veikinda, fæðingarorlofs o.þ.h. við mat á heildartíma frá lokum doktorsgráðu sbr. verklagsreglur HÍ um starf nýdoktora.

Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Miðað er við að nýdoktorinn hefji störf eigi síðar en í janúar 2027.

Umsóknarferlið er í þremur skrefum:

• Ferilskrá (með birtingum ef við á).

• Greinargerð um rannsóknir, um það bil eina blaðsíðu, þar sem umsækjandi gerir grein fyrir áhuga sínum á þátttöku í verkefninu og því hvernig þekking hans og reynsla getur nýst verkefninu.

• Námsferilsyfirlit úr grunn-, meistara- og doktorsnámi. Afrit nægja á þessu stigi og ekki er gerð krafa um opinbera þýðingu.

• Um hálfrar síðu lýsingu á rannsóknaráhuga og helstu styrkleikum umsækjanda.

• Upplýsingar (vinnustað og netfang) tveggja umsagnaraðila ásamt upplýsingum um tengsl þeirra við umsækjanda.

• Ef mögulegt er, rafrænt eintak af doktorsritgerð á frummáli og/eða úrval vísindagreina eða fyrri lokaverkefna sem umsækjandi hefur skrifað.

2. Umsóknir verða yfirfarnar að umsóknarfresti liðnum. Þeir umsækjendur sem teljast best hæfa starfinu verða teknir í netviðtöl (Zoom, MS Teams, o.s.frv.).

3. Sá umsækjandi sem verður boðið verður starfið skal leggja fram vottuð afrit af öllum prófskírteinum og námsferilsyfirlitum. Umsækjendur sem ekki hafa ensku að móðurmáli þurfa að sýna fram á enskukunnáttu. Stúdentspróf frá íslenskum menntaskóla telst uppfylla þetta skilyrði.

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknafrests.

Við ráðningu í störf í Háskóla Íslands er tekið mið af jafnréttisáætlun skólans. Vakin er athygli á málstefnu Háskóla Íslands.

Háskóli Íslands hefur frá stofnun verið undirstaða atvinnulífs og framfara í íslensku samfélagi. HÍ er jafnframt framsækinn rannsóknarháskóli og virkur þátttakandi í alþjóðlegu vísindasamstarfi.

Háskóli Íslands er stærsti háskóli landsins og býður upp á hátt í 400 námsleiðir á grunn-, meistara- og doktorsstigi. Um 14.000 nemendur stunda nám við skólann, þar af yfir 2.000 alþjóðlegir nemar.

Við Háskóla Íslands starfa yfir 1.800 manns. Skólinn leggur áherslu á að laða til sín fjölbreyttan hóp starfsfólks og stúdenta í alþjóðlegt fræðasamfélag þar sem akademískt frelsi, fagmennska, jafnrétti, fjölbreytileiki og inngilding eru í öndvegi.

Nánar um Háskóla Íslands, fræðasvið hans og deildir