Hvernig hafa húsin okkar það?

Taktu þátt í að móta framtíð stærsta fasteignasafns landsins sem verkefnastjóri viðhaldsáætlana.

Framkvæmdasýslan-Ríkiseignir (FSRE) heldur utan um stærsta fasteignasafn landsins og vinnur nú að því að gera langtímaáætlanir um viðhald þess með heildstæðum hætti, verkefni sem ekki hefur áður verið sinnt á þennan hátt. Við leitum að öflugum verkefnastjóra viðhaldsáætlana til að ganga til liðs við teymi sem sinnir verkefninu. Þar gefst tækifæri til að hafa mikil áhrif á hvernig verkefnið og verklagið þróast, greina ástand og viðhaldsþörf eigna og hafa áhrif á forgangsröðun verkefna svo eignirnar haldi verðgildi sínu og nýtist sem best.

Í starfinu stýrir þú úttektum á ástandi fasteigna og gerð skammtíma- og langtímaáætlana um viðhald, og tekur þátt í að þróa verklag og viðmið við ástandsmat. Þú kemur að gerð útboðsgagna og samninga um ástandsmat og vinnur náið með eignastýringu, þjónustuborði og forsvarsmönnum stofnana. Eignirnar eru af öllum toga og um allt land, allt frá skólum, heilbrigðisstofnunum og lögreglustöðvum til menningarhúsa og sögulegra bygginga, og einhverjar ferðir innanlands geta fylgt starfinu.

• Verkefnastjórn við greiningu á viðhaldsþörf eigna ríkisins

• Umsjón með úttektum á ástandi fasteigna, mat á viðhaldsverkefnum og þátttaka í forgangsröðun

• Gerð skammtíma- og langtímaáætlana um viðhald eigna

• Áframhaldandi þróun verklags og viðmiða við ástandsmat

• Þátttaka í gerð útboðsgagna og rekstri samninga um ástandsmat

• Samstarf við eignastýringu og viðskiptastjóra um forgangsröðun eigna og verkefna

Menntunar- og hæfniskröfur

• Háskólamenntun í mannvirkjagerð, t.d. byggingafræði, tæknifræði, arkitektúr eða verkfræði

• Að minnsta kosti 5 ára reynsla í mannvirkjagerð

• Góð samskipta- og samstarfshæfni

• Frumkvæði, metnaður, skipulagsfærni og öguð vinnubrögð

• Stafræn færni, geta til að vinna með gögn og læra á ný tölvukerfi

• Góð íslensku- og enskukunnátta og hæfni í tjáningu í ræðu og riti

Eftirfarandi telst til kosta

• Reynsla af viðhaldi, ástandsmati eða umsjón fasteigna

• Iðnmenntun og starfsreynsla á verkstað

• Reynsla af hönnun bygginga

• Þekking og reynsla af verkefnastjórnun

• Reynsla af útboðsmálum, innkaupum, rekstri samninga eða opinberri stjórnsýslu

Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Við bjóðum

• Verkefnamiðað vinnuumhverfi og sveigjanlegan vinnutíma

• Fjölbreytt og krefjandi verkefni sem snerta flest svið samfélagsins

• Stuðning við þekkingaröflun og starfsþróun, meðal annars aðgang að fjölbreyttum fræðsluveitum og alþjóðlegu tengslaneti

• Heilsustyrk og samgöngustyrk

• Hádegisþjónustu Maul

• Öflugt starfsmannafélag

• Fjölskylduvænan vinnustað þar sem lögð er áhersla á jafnrétti og góða vinnustaðamenningu

Um FSRE

FSRE annast fasteignir og jarðir ríkisins, öflun húsnæðis og stýrir framkvæmdum við breytingar, endurbætur og nýbyggingar, með það að leiðarljósi að afla góðs en hagkvæms húsnæðis í allra þágu. Stofnunin heldur utan um stærsta fasteignasafn landsins, 530 þúsund m² húsnæði í 380 eignum auk um 300 jarða og landsvæða. Hjá FSRE starfa um 70 sérfræðingar með breiða þekkingu á sviði fasteignaumsýslu, framkvæmda og eignastýringar. Við vinnum með gildin FRAMSÝNI - FAGMENNSKA - SAMVINNA að leiðarljósi.

Umsókn

Áhugasamir einstaklingar, óháð kyni, eru hvattir til að sækja um. Starfsstöð er í Reykjavík.

Umsókn óskast fyllt út á Starfatorgi og þarf henni að fylgja ítarleg starfsferilsskrá og kynningarbréf þar sem gerð er grein fyrir ástæðu umsóknar og rökstuðningur fyrir hæfni umsækjanda í starfið. Umsóknir geta gilt í sex mánuði frá birtingu auglýsingar, sbr. reglur nr. 1000/2019 um auglýsingar lausra starfa. Öllum umsóknum verður svarað að ráðningu lokinni.