Hjúkrunarfræðingar á dag- og göngudeild skurðlækninga

Ertu góður liðsmaður og langar þig að starfa í fjölbreyttu og lærdómsríku starfsumhverfi?

Við leitum að hjúkrunarfræðingum í okkar góða lið á dag- og göngudeild skurðlækninga við Sjúkrahúsið á Akureyri. Um er að ræða 45-90% stöður þar sem unnið er frá klukkan 12-20 virka daga. Einnig kemur til greina að ráða inn hjúkrunarnema sem hafa lokið a.m.k. 3 námsárum. Stöðurnar eru lausar nú þegar eða eftir samkomulagi.

Starfið er tilvalið fyrir nýútskrifaða hjúkrunarfræðinga sem og hjúkrunarfræðinga sem vilja breyta til í starfi og takast á við nýjar áskoranir í fjölbreyttu, krefjandi og góðu starfsumhverfi undir handleiðslu reyndra hjúkrunarfræðinga.

• Ábyrgð á öllum verkefnum hjúkrunarfræðinga samkvæmt lögum og reglugerðum

• Unnið samkvæmt markmiðum hjúkrunar, deildarinnar og stofnunarinnar

• Skipuleggja og veita hjúkrunarmeðferð

• Veita fræðslu til sjúklinga og aðstandenda

• Þáttaka í þverfaglegri teymisvinnu

• Þátttaka í þróun á starfsemi deildar

• Umsækjandi skal hafa lokið hjúkrunarfræðinámi frá viðurkenndri stofnun (á ekki við ef um hjúkrunarnema er að ræða)

• Gilt íslenskt starfsleyfi (á ekki við ef um hjúkrunarnema er að ræða)

• Reynsla af skurðlækningadeildum er kostur

• Lögð er áhersla á frumkvæði, sjálfstæð vinnubrögð og hæfileika í samskiptum og samvinnu

• Gerð er krafa um vammleysi, s.s. að vera með gott orðspor og að framkoma og athafnir á vinnustað og utan hans samrýmist starfinu

• Hreint sakavottorð

Laun samkvæmt gildandi kjarasamningi sem fjármála- og efnahagsráðherra og Félag íslenskra hjúkrunarfræðinga hafa gert.

Allar umsóknir þurfa að fara rafrænt í gegnum ráðningarkerfi ríkisins. Umsóknum skulu fylgja ítarlegar upplýsingar um nám og starfsferilskrá ásamt afriti af prófskírteinum og starfsleyfi, ef við á. Tekið er mið af jafnréttisstefnu Sjúkrahússins á Akureyri við ráðningar í störf á sjúkrahúsinu. Umsóknir geta gilt í 6 mánuði frá birtingu auglýsingar, sbr. 3. tl. 2. mgr. 2. gr. reglna nr. 1000/2019 um auglýsingar lausra starfa með síðari breytingum. Öllum umsóknum verður svarað.

Sjúkrahúsið á Akureyri veitir alþjóðlega DNV-GL vottaða heilbrigðisþjónustu með ISO vottuðu gæðastjórnunarkerfi þar sem áhersla er á virka þátttöku allra starfsmanna til að uppfylla þær gæðakröfur sem gerðar eru í alþjóðlegum staðli sem sjúkrahúsið er vottað eftir.

Samkvæmt mannauðsstefnu Sjúkrahússins á Akureyri er lögð áhersla á að ráða til starfa og halda í hæfileikaríka einstaklinga. Við val á starfsfólki er menntun, reynsla, færni og hæfni höfð að leiðarljósi. Mannauðsstefnan er leiðarljós stjórnenda og starfsfólks sem gerir sjúkrahúsið framsækinn og eftirsóknarverðan vinnustað, en hún byggir á grunngildum sjúkrahússins sem eru: ÖRYGGI, SAMVINNA og FRAMSÆKNI.